Paggena:Lo cunto de li cunte - Tomo I.djvu/197

197

Jornata II.

no Grannonia no gusto granne de sentire lo vernoliare, che facevano. La quale cosa visto la vorpe, le disse: Antro tanto piacere senterrisse, ntennenno chello, che diceno, comme lo ntenno io. A ste parole Grannonia, perchè le femmene hanno cossi pe natura la cu- curiositate, comme le chiacchiare, pregaje la vorpe a dìrele chello, che aveva sentuto a lo lenguaggio dell’aucielle. Ed essa, dapò fattose pregare no buono piezzo, pe guadagnare maggiore curiosità a chello, che doveva contare, disse che chille aucielle trascorrevano fra loro de na desgrazia soccessa a lo figlio de lo re; lo quale, essenno bello comme a no fato, pe non avere voluto dare sfazione a le sfrenate voglie de n’orca mardetta, l’era stata data na mardezzione, che fosse transformato nserpe pe sette anne; e che già era vicino a fornire lo tiempo, quanno, nammoratose de na figlia de re, se ne steva co la zita drinto na cammara, ed aveva lassato lo cuojero nterra; ma lo patre e la mamma de la zita troppo coriuse, l’aveano abbrusciato la spoglia. Lo quale, fojenno nforma de na colomma, a lo rompere na vitriata, pe sciro da na fenestra, s’era sfracassato de manera, ch’era desperato da miedece. Grannonia, che sentette parlare de l’aglie suoje, demannaje, la primma cosa, di chi era figlio sto prencepe, e si nc’era speranza de remmedio a lo male sujo. E la vorpe respose, ca chille aucielle avevano ditto ch’era lo patre sujo lo re de Vallonogruosso, e che non c’era antro secreto pe appilare le pertose de la capo soja, azzò non so ne scesse l’arma,