aggio fatto jettare, che nce potive appennere le fusa?, chesto è lo cammio d’averete puosto nforma de ragno; ed ave- rete sbrammato, dove avive l’allanca, pezzente, straccia-vrache!, che jere no sbrenzolato, sdellenzato, spetacciato, perogliuso, spogliampise! Cossi va chi lava la capo all’aseno! Va, che te sia marditto quanto faggio fatto, ca non mierete, che te sia sputato ncanna! Bella gajola d’oro, che m’avive apparecchiata!, bella sepetura, che m’avive consignata! Va, siervo tu, stenta, fatica, suda, ped avere sto bello premio! Oh negrecato chi inette lo pignato a speranza d’autro! Disse buono chillo felosofo: chi aseno se corca, aseno se trova! Nsomma, chi chiù fa, manco aspetta! Ma: bone parole e triste fatte, ngannano li savie e li matte! Cossi decenno e capezzianno, se pigliaje la via de fere; e, pe quanto Cagliuso, co lo permone de l’omelità, cercaje alliccarela, non co fu remmedio, che tornasse arreto. Ma, correnno sempre, senza votare mai capo dereto, deceva:
Dio te guarda de ricco mpoveruto,
E de pezzente, quanno è resagliuto
