na e na Catarina Papara; na sfortunata e na bona asciortata; che, pe ragione, essenno tutte de na streppegna, deverriano essere tutte de na natura. Ma lassammo sto descurzo a chi chiù ne sape: ve portarraggio schitto l’assempio de chesto, cbe v’aggio azzennato, co tre figlie de na mamma, dove vedarrite le deverzefcate de costumme, che portaje le marvase drinto no fuosso, e la figliola da bene ncoppa la rota de la fortuna.
Era na vota na mamma, ch’aveva tre figlie, doi de le quale erano accossì sbentorate, che mai le veneva na cosa mparo; tutte li designo le rescevano travierze, tutte le speranze le rescevano a brenna. Ma la chiù picciola,ch’era Nella, portaje da lo ventre de la mamma la bona ventura; e creo, ca, quanno essa nascette, se conzertaro tutte le cose a darele lo meglio meglio, che potettero:lo cielo le deze l’accoppatura de la luce soja; Vennero, lo primmo taglio de la bellezza; Ammore, lo primmo vullo de la forza soja; natura, lo shiore shiore de li costumme. Non faceva servizio, che no le colasse a chiummo; non se metteva a mpresa, che no le venesse a pilo; non se moveva a ballo, che no ne scesse a nore. Pe la quale cosa, non tanto era da le guallarose de le sere midiata, quanto era da tutte l’autre amata e voluta bene; non tanto le sore l’averriano voluta mettere sotta terra, quanto l’antro gente la portavano mparma de mano. Ed essenno a chella terra no prencepe fatato, lo quale jeva pe maro de la bellezza soja, tanto jettai l’amo de la servetute ammorosa a sta bella aurata, pe fi che la ncroc-
