Paggena:La Divina Commedia Napoletano Domenico Jaccarino-Nfierno.djvu/40

— 42 —

CANTO OTTAVO ARGOMIENTO

Trovannose ancora Dante dinto a lo quinto circolo, comme fuje arrivato a li piede de na Torra, po nzignale de doje sciamme, levato da Flegias, chillo che piglia e porta l'aneme a chillo luoco, dinto a na varchetta, e dinto a la paluda cammenanno, se contra co Felippo Argenti, de lo quale visto lo strazio, sequetano nnanze nfì a tanno che arrivano a la Cetà de Dilo dinto a la quale volenno trasì, vene lloro nchiusa la porta nfaccia da cierte diavole.

Primma che nuje fosseme arrevate
Abbascio de la torra, a ccammenare
La cimma nuje guardavamo affannate
Pe doje sciamme che llà stevano chiare,
E pe n'autra, a nuje lontano a siesto,
Ch'appena l'uocchio la potea guardare.
E votato io a Vergileo lesto lesto,
Disse: Chesto che dice? e che risponne
Chell'autro ffuoco, e chi facette chesto?
E isso: Ncoppa de le ffetente onne
Già può vedere chello che s'aspetta,
Si ccà la neve non te l'annasconne.
E comme se vedesse na saetta
Che va pe l'aria co la fujarella,
Mme vedette io pe nnante na varchetta.
E llà assettato steva dinto a chella
No briccone che nce venea strellanno,
Ma forte; Si arrevata, anema fella?
Fregiasso, t pe niente staje alluccanno,
Vergileo le dicette assaje pracato,
Tu nce avarraje, lo fango ccà passanno.
E comm'a chillo, che si è coffejato
Se nfuria e a rosecà lesto se mette,
Freggiasso se facette, ma stezzato.