io lascio vinte lire! All’infuori ’e tutt’’o riesto: pesone[1], acqua, lavannara[2], pecché essa nun lava. E pure ’a femmena ’e servizio. E ve pare ca io starrie ’o caso ’e tene’ ’a femmena ’e servizio? Ma io zitto: cinquanta martellate ’e cchiu ’ngopp’a ’ncunia! Ciente gocce ’e sudore supierchio[3]! e mantenimmo Pure ‘a femmena ’e servizio, pecché essa, la mia signora, ’e mmane nun s’ ’e po spurca’! Quindi, pe’ ripiglia’ ’o raggionamento, tutto chello che aggi’a fa’ io, chello ca spetta a me, io ’o ffaccio! Stando così le cose, avarri’a essere l’ommo d’’a casa, no?
Don Peppe — Ah, certo!
Giovanni — ’O padrone assoluto?!
Don Peppe — Giusto!
Giovanni — E invece, io songo ’o zi’ e nisciuno[4], Don Pe’! Oh, e che colpa tento io, si pe’ chesta femmena nun conto niente? Risponnite! (Pausa) Dopo di che… e veniamo al vostro apprezzamento, che è poi l’apprezzamento di tutti: «M’hé pigliato pe’ Don Giuvanne?» Come dire: «Don Giuvanne, si nun è n’imbecille, è per lo meno tre volte buono, che poi è lo stesso». No! Io nun songo n’imbecille, e nun me mancarrie[5] né ’o curaggio né ’a forza… (Pausa) Ottene’ pe’ forza ’ammore, ’o rispetto, ’a cunsiderazione ’e sta femmena, è na cosa ca me lasciarrie[6] troppo ’a vocca amara pe’ tutta ’a vita! ’Ammore, comme vulimmo dicere, ’o rispetto… ’o rispetto, comme ’o vulimmo chiamma’, nun se conquista cu ’a forza, se conquista cu ’a bontà. Dice: ma tu si troppo buono; e che aggi’a fa’! Aggi’a passa’ nu guaio? E po’, nun moro[7] pur’io ugualmente? si io nun ce pozzo rinunzia’?! Cuntatte[8]? cu essa, niente? Ma è viva, campa. Embé,’o penziero sulo ca campa, e ca sempe m’è mugliera, me da ’a forza ’e campa’ pure a me! Che aggi’a dicere? Sperammo ca ’o Signore, quaccheduno… lle desse ’e lume, e ’a facesse ravvede’!
Don Peppe — Capisco, vuie site malato ’e sta femmena; e nun ve ne putite libera’.
Giovanni — Malato! Tengo na malatia inguaribile! E, d’altra parte, ’o matrimonio chest’è… Però, Don Pe’, comme moralità, nisciuno me po dicere niente. (Pausa) Me stesse zitto pecché ce truvasse nu tornaconto?
Don Peppe — No, che dicite? Vuie?!
Giovanni — E dunque? Io resto onorato ugualmente quanno aggio fatto tutt’’o duvere mio; quanno ’e mmane, ’a faccia, ’o pietto se so’ abbrusciate[9] vicino a na carcara[10] ’e fuoco pe’ ffa’ ll’ommo!… L’onore? L’onore è personale! Chi
