Chesta paggena nun è stata leggiuta.
— 26 —
Ncopp’ ’e bancune ’e marmule
moreno ’e frutt’ e mare:
so vviecchie ll’ustricare,
so’ voce chien’ e lagreme:
genio nun ce ne sta!
Cantine sulitarie!
Tavule abbandunate,
ch’ancora se ricordano
ddoie vocche ’e nnammurate
ca parlano e se vaseno
senza vasà e parlà!...
Sacc’ io che me vuò dì
Pusilleco, Pusì:
vuò dì ca mo nun ride
cumme na vota cchiù,
pecchè passà nun vide
l’Ammore e ’a Giuventù
Nun sento cchiù pe’ st’aria
n’addore appriesso ’a n’ato:
tu te trattien’ o sciato,
sacc’ io pe’ chi, Pusilleco,
pe chi t’ ’o vuò astipà...
Ca si dimane Napule
se sceta cu ’e fanfarre,
cchiù allegro tu risuscite
cu vvoce e cu chitarre:
Si ’a luna sta in America,
fa ’o giro e sponta ccà...
