Pan. Vorrisse na venerianella?
Mat. No.
Pan. Vorrisse na pezzella co la nzogna caso e mmasenicola?
Mat. No, no.
Pan. (sottovoce e con interesse) (Vorriss’essere chiammata la sposa de Roberto?)
Mat. (e. s.) (Ah! vuje sulo sapite conoscere la malatia.)
Pan. Fratiè, aggio capito: patisce de caldiagia de core.
Oro. Che caldiagia... ajere ha fenuto ll’acqua zorfegna; pe ttre mmise ll’aggio fatto piglià li ccimme de spine...
Pan. E mmo nce vò la salsa paisana. Fratiè, tu sì cciuccio assaje, e cchiù cciuccio perchè sì ccarreco de denaro.
Oro. (con mal garbo) Denare! denare! tornammo a ttoccà sto tasto ca li strille li ffaccio sentì a nzì a Ppezzulo... Non tenco niente, mmalora! non tenco niente.
Pan. E allucca, allù.
Oro. Vivo co cchello ppoco de guadagno che mme dà lo magazzeno: guadagno che s’è gghiuto a ffa squartà perchè st’anno li ssopressate hanno fatto sfriddo, la quarta parte ha pigliato de scarfàto: li casecavalle so state de mala qualità, e cche mme so rrummase? doje meze vutte de sarache e arenche... Mme l’avite jettàta... — tene denare, tene denare! — tenco lo cancaro.
Pan. (trasè) (E strìgnelo pe lo tuppo.)
Mat. (alzandosi impetuosamente) Ah! e ccomme volite che sta figlia stesse bona, comme! alluccate sempe, chiagnite, ve disperate... quase quase comme stisseve cercanno la lem-
