ATTO PRIMO
Camera con porta in mezzo e finestra in fondo.
SCENA I.
Matilde seduta, Oronzio e Pangrazio la circondano, indi Faustina.
Oro. Metilde, Metilde... ma rispunneme pe ccarità!.. ta mme faje fa no pìzzeco!
Mat. (infastidita) Vuje che vvolite? che bramate? làssateme sta co li malanne mieje.
Oro. Ma io te so ppatre o sono turzo? m’aggio da nteressà sì o no de la salute toja? da ll’autriere che te sì pposta mmalinconia, e nnisciuno te po parlà, nisciuno te po guarda!... Te siente dolure ncuorpo, te siente dolore de capo; che burora te siente?
Mat. (con dispetto) Mme sento ca vorria morì a cchisto momento.
Oro. Che pparole so ccheste! comme tu mo... auh! mme farrisse passà no guajo.
Pan. E llassala ire; tu la stuone co sti modi tuoi!.. (amoroso) Tetella de zì-zio tujo, vorrisse na limonatella?
Mat. (e. s.) Non boglio niente!