Mar. Uh! comme scorda, comme scorda…
Pul. Mo; v’aggio ditto ca stammo a lì bemolle.
Car. Tu haje da dicere «Me vuò pe mmarito?» Io te risponno «Sì:» Chesta è la mano, simmo marito e mmogliera. (dandogli la mano)
Pul. (a Mariannina) Te si ppersuasa? E ffinale cchiassuso chisto sì o no? Nce stanno mpottonale li diesis, li sospire, e ttutte li sopraffiate?
Mar. Ebbiva! mo non aggio che ddicere; marito e mmogliera, e lo Cielo ve manna no delluvio de contentezze. (entra)
Pul. Nzomma nce simmo mise, ed un bel marcantonio dilatarà sù di noi le sue turbolentissime felicità.
Car. Uh! teccote D. Pangrazio co D. Andriuccio lo figlio.
SCENA III.
Pangrazio, Andreuccio, e detti.
Pan. Vide, vide figlio mio che appartamiento! ma chesto è nniente; co li mmigliara haje da contà l’argentaria, ll’oro, li brillante…
Pul. (L’allucche, li mmazzate quanno se scommoglia la mbroglia!)
And. (a Pan.) Avite ragione, era proprio na bestialità a pperdere sta fortuna.
Pul. (facendosi avanti) Uh! monsiù Pangrazion siete un’altra volta decapitato? Bravo! La signora jeri sera per tanta allegrezza che ha avuto nel sentire che doveva sposoleggiare il vostro figlio…
