Paggena:Altavilla - La sposa co la maschera.djvu/68

'A Wikisource.
Chesta paggena è stata leggiuta.
— 68 —

de direncello nfaccia, se tratta ca so dduje anne e mmiezo che…

Pan Dice buono, jammoncenne. (avviandosi)

Mau. Aspetta: (trattenendo Andreuccio) Damme primma trenta ducate che te mprestaje l’autriere.

Pan. Comme! tu ll’è mprestato trenta ducate? tu non baje trenta calle.

Mau. Io ll’aggio dato trenta ducate in oro che tteneva agghiettalo. è lo vero? (ad And.)

And. (piano a Mau.) (Tu che staje dicenno?)

Mau. (ad And similmente) (Fammille dà ca sino so arrestato da l’usciere.)

And. (Haje ragione.) (a Pan.) Ah se, papà, mm’arricordo.

Pan. Ah mpiso! mpiso! tu sfarine 30 ducate accossì vierde vierde? Che nn’haje fatte?

And. Io… io… (confuso) (Io non saccio che aggio da dicere..)

Mau. Ma confessa, di che nn’haje fatto. (a Pan.) Li ddette a na povera figliola che tteneva lo frate che steva pe gghì carcerato pe ddebeto.

Pan. E tu vaje a ccaccià trenta ducate pe uno che non canusce?

Mau. Lle facette spartere lo core; ll’afferrajeno, lo tenevano strinto e Ndreuccio pe ccompassione lle dette li trenta ducate.

And. Gnò, non aggio visto ancora no caso simmele.

Pan. Uh! cheste so ccose che succedono vinte trenta vote lo juorno… io pure, quanno principiaje a ffa lo casadduoglio jette tre bote a la Concordia. (a Maurizio) Basta, ti si daranno. (avviandosi)