Cic. (a Pan.) Lo voccolaro salato vuje lo bennite…
Pan. Dalle dà… tu che buò da me? (a Carmi.) Ma signora, voi potreste…
Car. Volete parlare a madama Dicarocchie? un momento. (entra a dritta)
Nic. (a Pan.) Chesta dice Dicarocchie, e cchillo ha ditto Quattocarocchie.
Pan. E sso sè carocchie; embè avimmo pagato dicedotto carrine pe ssè carocchie!
SCENA VIII.
Anselmo , travestito, indi Tommaso, poi Maurizio, in fine Pulcinella.
Ans. (tra sè) (Aggio appurato che Mmaurizio sia trasuto pe ccammariere co sta signora co la maschera che non s’è bista ancora! aggio saputo ca chesta cchiù ttardo va a ppassià pe la Villa co isso appriesso, e ttengo perzò la gente agguattata abbascio: lo fatto sta ca chillo se sarrà travestùto; mm’avarria d’accerta buono buono chi è tra la servitù.
Nic. (a Pan.) Uh gnorezi, chisto è ppure uno de li concorrenti? (indica Ans)
Pan. E ttene na bella faccia pe ffa lo sposo.
Ans. (a Pan.) Fateme grazia signore, se potarria vedè….
Pan. Amico mio, io aggio cacciato na pezza e mmeza, e pe mmo non aggio visto niente.
Ans. Io ve parlo de Maurizio lo cammariero.
Pan. (infastidito) Io che ssaccio de Tizio e Mmaurizio.