Paggena:Altavilla - La sposa co la maschera.djvu/54

'A Wikisource.
Chesta paggena è stata leggiuta.
— 54 —

Nic. (tra sè) (Tu vì che s’ha puosto ncapo sto viecchio de ziemo; mme to fa sposà sta signora co la maschera, quanno io tenco ncapo a Llucrezia mia.)

Pan. (a Nic.) A tte, saluta co ttiermene a sti signure.

Nic. (salutando tutti) Signori i miei esequii.

Ale. I vostri funerali. (rispondendo al saluto)

Cic. (osservando Pangrazio) (Uh bonora! Pangrazio lo casadduoglio pure è bbenuto cca!) (a Pan.) Amico te so schiavottiello.

Pan. (fingendo di non conoscerlo, dice con gravità) Chi è costui? come puzza di lardo vecchio! Bongiorno plebeo.

Cic. (tra sè) (Mm’ha chiammato abreo! mo lo voglio acconcià io: vì sio casadduoglio arrozzuto quanta tuba che ha puesto!)

Nic. (a Pan.) Chi è questo plebiscitolo? (indica Ciccione)

Pan. È no pizzicagnolo.

Mic. (a Cic.) Sì pizzicagnolino e biene ccà sopra in coppa? Andate, voi siete un mitirìale, la signora non si degna di smicciarvi cogli occhi ora che verrà qui ffuori a dissonorarci.

Pan. (Nicolì mantiènete, ca mme pare che nn’è ditto tre dinto a na botta.)

Nic. (Gnore zì, mme scappano e non me naddono)

Cic. (a Pan.) Nne faciteme finezza, la nzogna va a lo stesso prezzo?

Pan. (tra sè) (Vì chisio comme fete d’essere acciso! ca ncoppa parla de la nzogna.)