SCENA V.
Pulcinella e Maurizio, vengono contrastando
Pul. Maurì, Maurì, tu non ne parlà vì… aggio risoluto che la signora co la maschera ha dda essere la mia, e la mia ha dda essere, non ce vonno cchiù pparole.
Mau. (lo prende per petto)
Pul. Maurì, statte cojeto, ca io tenco tre ore de fuoco ncuollo.
Mau. E io co ttutto lo ffuoco che ttiene, te voglio nfocà buono buono co no paro de càuce si dice cchiù sta parola.
Pul. Addavero?
Mau. Addavero. (si guardano entrambi in aria minaccevole)
Pul. E ffatte cchiù ssotto.
Mau. Lo vi cca. (accostandosi)
Pul. E ddì n’auta vota la parola ch’è ditto.
Mau. «Te donco dì cauce.»
Pul. Ma lo ddice co la vocca?
Mau. No, te lo ddico co li fatte. Tè (dandogliene uno)
Pul. É uno; e ll’auto?
Mau. Tè, Chisto è ll’auto,
Pul. Siente; sì mme dive doje pònia mme resenteva; mm’è dato duje càuce e tte ringrazio, perchè mme s’è sciuòveto no rèumo nell’occipite settentrionale.
Mau. E io te donco pure li ppònia.
Pul. Addavero?
Mau. Addavero. Tè. (dandogli un pugno)
Pul. É uno; e ll’auto?
Mau. Tè, chisto è ll’auto?