SCENA V.
Maurizio e detto
Mau. (da dentro) Va bene, va bene: aggio capito... uh quanta chiacchiere!... ll’aggio da vedè co ll’occhie mieje pe lo ccredere. (esce ridendo sgangheratamente) Ah, ah, ah! è ccosa da ridere, ma da ridere veramente.
Mar. Che nc’è ne Maurizio?
Mau. Si sapisse, sie Mariannì, è succieso no caso a Nnapole, ma vì, na cosa che te fa strasecolià; è rraro, ma raro assaje. Nce sta na signora venuta da fora...
Mar. Che ttene la faccia comme a na morta.
Mau. E pe non se fa vedè...
Mar. Porta la maschera.
Mau. E tu comme lo ssaje?
Mar. Chesta è na notizia che ba cammenanno da doje semmane: se dice che ttene mille ducate a lo juorno de rènneta, che se vo mmarità, e che lo sposo non porta che sia de qualunque condizione, abbasta ch’è no galantommo e non brutto.
Mau. (tra sè) (Bonora! cca non se pazzea! ora io so no disperato, nzellato nzi all’uocchie; non so brutto... mo mme faccio la varva, mme metto li capille a bintitrè ora e mmeza e... e la faccia de morta? che mme mporta, doppo che ffosse cchiù brutta de Proserpina. Mille ducate a lo juorno de rènneta so ccannarute...ma chesta mme pare na bubbola bella e bona!)
Mar. Che ddicite ne si Maurì?