Ndreuccio, capisco che la cosa pe mmo non po succedere, ma è ccolpa mia fuorze?
Mar. Comme mo, io non capesco.
Ros. Quanno Ndreuccio se mettette a ffa l’ammore co mme, era giovane de mercante; lo padre, lo sì Pangrazio, era casadduoglio, parlaje co ffratemo e n’era cchiù che contento de sto matrimmonio. Non saccio si la sciorte o la mmalora n’anno arreto mannaje no terno de tridece milia ducate a sto sì Pangrazio; da tanno l’affare suoje so gghiute mpoppa de na manera tutta nova, e sto briccone mmece de fa succedere lo matrimmonio e farce felice, s’è ffatto n’avaro de lo diavolo, non ne vo sapè niente cchiù de lo sposalizio, e ha fatto cchiù de na battaria a lo figlio pe ccausa mia… ma che? Ndriuccio se scorda de me? chesto è mpossibile! Va, damme licenza, ca lo tiempo scorre e la fatica non assomma.
Mar. Sièrvete, sièrvete. (Rosina entra) Chillo bonora de Maurizio, lo frate mo è lo fatto mm’è accossi simpatico che no lo ppozzo esprimmere; non se po chiammà bello, non è ttanto figliulo, ma che ssaccio, tene na cierta grazia che mm’ave affatturata de na nova manera, e lo voglio bene cchiù perchè tratta semplice e ssenza secunno fine. (guarda casualmente alla porta d’entrata) Uh teccolillo ntiempo.