Luc. Ah! primma.. e mmo è tutt’ auto: mo è ppadrone de doje case, e nnegozia pure nzieme co D. Pascariello.
Mar. D. Pascariello! no servitore arrozzuto mo D. Pascariello!
Luc. Già, D. Pascariello; che cco li denare suoje ha fatto società co zziemo, e ddanne onestamente li ssomme mprièsteto.
Mar. Onestamente... cancaro! e lo saccio io che comm’ a ppovera lavannara che ssonco, me piglio vinte ducate a la vota e nce ne torno trenta a ssè carrine la semmana... brutta gente! brutta gente! co na coscienza chiù nnera de na cemmenera.. Fa buono, fa buono Carmenella che ppenza a mmaritarse co Ttotonno lo proprietario de li carrozzelle d’ affitto, ommacaro se nn’ abbja da dinto a sta casa mmardetta.... Tu pò te sì ncaponuta a sposarte Pascariello....
Luc. Tu che buò sposà.. aspetta che ddice gnorzì e bbògliolo ca po sciacquà lo brito.
Mar. (soddisfatta) Ah! e ccònteme ca te conto: nc’ è quacch’ auto chiovetiello che te sta ncore, dì la verità a Maria.
Luc. Zitto pe ccarità, ca sinò me faje accidere: tu canusce a Ttitto lo negoziante de còria?
Mar. Ah! sè, sè: perche sto o veco spassià chiù dde na vota pe la casa vosta...
Luc. Marì, acqua mmocca sà: chesta è na cosa che non la sape manco Carmenella sorema... uh! non me ncanno... (guardando al di fuori del cortile) sì, è essa, teccotella ch’ è ttornata da Salierno.
Mar. Che bell’ abeto che pporta nouollo, pròpete all’ urdema moda vì.
Luc. Mo siente comme scassca zì Simone quanno la vede accossì beatuta. (incontrandola) Carmenè...
