come una salvietta, in modo che il pubblico non se accorge, e la mette nel piatto) Mo siente rise!
Rosella (dal fondo con 2 piatti, uno con carne, e l’altro con 2 uova sode) — Michè, ’e patrune che fanno? (li mette in tavola).
Michele — Seh, che fanno?… Mo s’hanno fenuto ’e fa n’ata spelliciata.
Rosella — Mamma mia, ma chiste fanno un’arte d’’a matina ’a sera? Stanotte è succiesa chell’ammuina. Dich’io po, quanno ànna sta accussì, è meglio che se spartene.
Michele — E chello che dico pur’io.
Rosella — Invece ’e sta cujeto, nun le manca niente, sò duje perzune, senza figlie… Ah!… leva lè! (guarda verso d.) Uh! Zitto!… vene D. Felice, (si ritirano in fondo).
Felice (con lettera) — Michè, dite al guardaporta che portasse mo proprio sta lettera al suo indirizzo. Bada ch’è un’affare ’e premura.
Michele — Vulite c’’a porto io stesso?
Felice — Tu, ’o guardaporta, chi nce vo j nce va. Basta che facite priesto.
Michele — Va bene. (p. a.).
Amalia (con lettera) — Michè, porta mo proprio stu biglietto al suo indirizzo. (ce lo da).
Michele — Scusate, signò, aggia purtà primma sta lettera d’’o marito vuosto.
Amalia — ’A puorte doppo. La mia è di gran premura.
Felice — La mia è urgentissima!
Amalia — La mia è pressantissima!
Felice — La mia è grandissima! (Uh! grandissima).
Rosella — Va buono Michè, fa nu zumpo, e portele tutt’’e doje.
Michele — Mo ve servo subeto subeto. (via).
Rosella — Ma comme, signorì, vuje mo avita sta sempe scuiete, pe na cosa ’e niente v’avita piglià tanta collera?
Felice — No, mo finisce tutto.
Amalia — A n’atu poco s’accunciarrà tutte cose.
Rosella — Assettateve, facite colazione. Ccà sta ’a genovese, ccà stanno ll’ova, chesto che cos’è, site spusate da n’anno, v’avarrisseve da vulè bene, invece facite sempe chiacchiere.
Felice — Tu ntrichete dei fatti tuoi.
Amalia — Cheste so cose che a te non te riguardano.
Felice — Tu sei una serva, e sta al tuo posto.
