Michele — Subito (via pel fondo).
Felice — Posso mai credere, che da nu mese, sti giocoliere venene sotta fenesta mia, ogni mattina, all’istessa ora.
Amalia — Accussì, spontaneamente.
Felice — Senza che nisciuno le dice niente.
Amalia — Senza che nisciuno ’e paga.
Felice — Quaccheduno adda essere ch’’e fa venì.
Amalia — Quaccheduno nc’à da sta ch’’e refresca.
Felice — Io pe me, nun ’e refresco certo (Io ’e refresco ’e n’ata manera).
Amalia — E io manco.
Felice — È impossibile!… Pecchè si chille nun sarriano pagate, nun venarriene a fa tanto fracasso. Io aggio appurato tutto cose, quei ridicoli, sono pagati da voi.
Amalia — Da me? Ah! ah! ah! Mo me faje pure ’a parte faticata, chille so pagate da te.
Felice — Da me? Uh! Io pagave a chille pe farle fa: Nfrunghete, nfrunghete, nfrù?
Amalia — Sì, da te, che staie facenno tanta cose, pe me fa schiatta ncuorpe a me poverella. Da n’anno che simme spusate, io aggio perzo ’a pace, mo pe na cosa e mo pe n’ata, nun pozzo sta maje cuieta. Stanotte aggio fatta chella nuttata.
Felice — E che l’avete fatta per me la nottata?
Amalia — Se capisce, pecchè tu m’aie fatta cocere c’’o scarfalietto.
Felice — Io?! Voi l’avete messo nel letto… e po è succiesso chillo guajo!
Amalia — Uh! Io l’aggio miso! Io l’aggio truvato dint’’o lietto. Vattenne, vattenne, briccone, sta vita nun a pozzo suppurtà chiù, me ne voglio j, me voglio spartere, nun te voglio vedè chiù (via 1.ª a s.).
Felice — E io chesto vaco truvanno. Mannaggia l’arma ’e mammeta, vì che me sta facenno passà! Mo te acconc’io. (via 1.ª a d.).
SCENA III.
Michele, poi Rosella, poi Felice, indi Amalia.
