Antonio (Stateve zitto, non parlate con lei).
Felice — Io non parlo cu essa, l’aggio cu na persona che stammatina l'ò salutata, e non m’à risposto. Si 'o sapeva, seh, mo ’a salutava!
Amalia — Io nun tengo ciente facce comme tiene tu!
Anselmo — Signò, vuje nun avita fa tanta chiacchiere, nun parlate cu isso.
Amalia — Io nun parlo cu isso, l’aggio cu na persona che sta diventando ridicolo bastantamente!
Felice — Oh! ridicolo poi...
Antonio (ridendo) — Bravo, bravo, bravo...
Felice — E chisto ca se recrea!
Antonio — (D. Felì, à detto solo ridicolo? Io avrei voluto che v’avesse detto delle altre cose).
Felice — (E già, si me deva na seggia ncapo).
Antonio — (Nun ve n’incarricate, poi vedete che accusa che fo io).
Felice — (Eh, accusa tre tre, e la napolitana a coppa!).
Michele (a Rosina) — (Mo vide che se vattene ccà ncoppa)
Rosina — (E a chesto va a fenì!).
Usciere (uscendo) — Favorisca signore, da questa parte. (introduce Gaetano e via). (Gaetano indosserà una scemis col bavero alzato. Sarà pallido. Entra piano piano col cappello in mano, e guardando intorno).
Felice — Uh! D. Gaetano (andandogli incontro). D. Gaetano mio. Eh, dice che non veniva D. Gaetano, o galantomo sempe galantomo è. Quanto è bello D. Gaetano! D. Gaetà, ricordatevi, porco, e baccalaiolo!
Gaetano — Seh, mo penzo justo a buje! Tengo ato p' a capa D. Felì. Mia moglie me vo fa la causa di separazione capite?
Felice — E a me che me ne preme.
Gaetano — E aie da vedè che me ne preme a me ’e te!
Felice — No, dico, che ogge non me preme, forse dimane...
Gaetano — E a me me preme ogge e dimane.
Felice — D. Gaetà, assettateve ccà, vicino a me.
Gaetano — (E bì quanto è seccante) (siede vicino a Felice a s.).
Felice — D. Gaetà vuje avita dicere che muglierema me chiamò porco e baccalaiolo.
Gaetano — Ma io tengo e guaje mieje.
Felice — D.Gaetà... contentatemi, che io po... mi levo l’obbligazione. Ò preparato na cosa che... po v’a manno ’a casa... na cosettina... che vi farà piacere... Dice, ma che cos’è!... Non lo sò! (ridendo). Non si può dire! (accomodandogli i capelli) Vuje faciteme nu buono
