Felice – Nu fatto? Io me moro ’e suonno! Sentite. Sul principio che me la sposai, essa mi fece capì che ’a notte durmeva c’’a lampa, al contrario di me, che se ’a stanza nun sta oscuro io nun pozzo piglià suonno.
Antonio Guardate un po, due abitudini diverse.
Felice – E già, che questo è stato; ma pure per contentarla nc’appicciaie ’a lampa. Due o 3 giorni dopo, la notte vaco pe me scetà, e la trovo assettata miez’’o lietto. Neh, Amà, e tu che fai, perchè non dormi? Pecchesto. Io non posso pigliare sonno, chella lampa è troppo miccia, io voglio n’ata lampa. Allora io cu na bella pazienza, nc’appicciaje n’ata lampa, e così stette cujeto pe nu pare ’e mise. Doppo sti 2 mise, na notte me vaco a scetà, e nun a truvaje dint’’o lietto! Vaco vedenno p’’a casa e nun a trovo, addo ’a trovo, fore ’a loggia!… Tu che faje loco fora? Trase dentro, tu può piglià nu raffreddore… No, io voglio sta quà, pecchè io nun tengo tutt’’e comodità d’a casa mia, io nun pozzo durmì pecchè sto troppo all’oscuro… io voglio n’ata lampa!
Antonio — Una terza lampada?
Felice — Avvocato mio, chella cammera ’e lietto pare na galleria! Basta, pe levà ogni quistione, nc’appicciaje n’ata lampa. Ma però, sapite io che faceva, verso l’una doppo mezanotte, che essa, sera addurmuta, scenneva d’’o lietto zitto zitto, e stutava e lampe (ridendo).
Antonio (ridendo) — Bravo, un bel ritrovato.
Felice — Eh, pe dormì io, si no durmeva sulo essa. E ò fatto questo pe nu bello poco ’e tiempe. Stanotte doppo nu poco che io aveva stutato ’e lampe, ò inteso a essa che gridava comm’a na pazza. Ah! chi ha stutato ’e lampe, chi è stato… Chi lo sa, moglie mia, se sarranno stutate a pe loro. No, sei stato tu, che ài deciso di farmi morire, me vuò fa venì na cosa a me poverella… Nu fracasso, avvocato mio! È curruto ’a serva, ’o servitore, ’o guardaporta, ’a folla sott’’o palazzo accussì… se credevene ch’era incendio! Basta doppo tant’ammuina, doppo tanta strille, aggio appicciate ’e lampe n’ata vota, essa s’è addurmuta a nu pizzo d’o lietto… io a n’ato… perchè comprenderete bene caro Avvocato cu tutte ’sti cuntraste che succederle ogne sera… essa sta a nu pizzo d’o lietto… io a n’ato… Quando tutto nzienie so ghiuto pe stennere ’a gamma, e mi sono inteso scottare nfaccia ’o purpone (mostra il polpaccio).