Papele — ’O dicite a me?!... Io chella matina, me volevo accattà ’no palammeto...
Perzeghella — N’aveva abbesuogno ’o puveriello!
Papele — E chillo, ’o pisciavinnolo, ne teneva uno frisco e n’auto che puzzava a mille peste. Io volevo ’o palammeto frisco. E chillo, pe fforza, me voleva mmuccà ’o palammeto fetente. Allora i’ me facette brutto...
Perzechella — E che nce abbisognava, è tanto brutto!
Papele — Me mettette ’n coppa ’o punto; e tanto facette che chillo, ’o pisciavinnelo, me schiaffaje ’o palammeto ’n faccia...
Nicola — ’O frisco?
Papele — No ’o fetente.
Nicola — Ma tu pecchè te vuo’ fa’ piglià pe cchiù scemo ’e chello che si?
Papele — Eh no.... pecchè.... chillo jette pe schiaffarlo ’n faccia a mme, e pe sbaglio, ’o cugliette ’ nfaccia a Carmela, che, a chillo momento, me passava pe vicino....
Perzechella — Eh, nce steva io ’pure presente...
Papele — S’arrevutaje ’a Pignasecca!
