Chesta paggena è stata leggiuta.
70
Poesie
DON PEPPE
Mezauotte. ’O farmacista
’nchiude e passa... E ’on Peppe Quaglia,
mmiez’ ’e ccarte culurate,
taglia e ’ncolla, ’ncolla e taglia.
— Neh, don Pè? — fa ’o farmacista —
Quante songo, pe’ ssapé?
— Cu’ chist’ato ca fernesco
— fa don Peppe — vintitré.
L’una e mmeza! ’O putecaro
stuta ’o ggasse e trase ’a mosta,
e don Peppe, ’a faccia ’e ccarte,
nun se smove... nun se scosta.
— Neh, don Pè? — fa ’o putecaro —
Che se dice? Che s’è fatto?
— Cu’ chist’ato ca fernesco
— fa don Peppe — vintiquatto.
