Chesta paggena è stata leggiuta.
71
Core e penziero
E assettato, cu ’n’acchiara
’mpont’ ’o naso, ’on Peppe Quaglia,
mmiez’ ’e ccarte culurate,
taglia e ’ncolla, ’ncolla e taglia.
’A mugliera cappuzzéa...
pecché già nun ne pò cchiù:
e don Peppe taglia carta
verde, rossa, gialla, blu...
Zerepillo, ’n copp’ ’a seggia,
s’arrutea comm’a ’na palla;
e don Peppe taglia carta
bianca, nera, rossa, gialla...
E che caccia ’a chelli mmane
ca nun trovano cchiù abbiento,
quanno azzecca ’o ppoco d’oro,
quanno azzecca ’o ppoco ’argiento!
Teh! Mo’ ha fatto ’nu cemiero
cu’ ’a vesiera a strisce ’e stagno,
che me pare overo chillo
ca purtava Carlo Magno!
Chillo, ’on Peppe, sape ’a storia;
chillo, ’on Peppe, è naso fino!
Te fa n’elmo ca tu dice:
chisto è l’elmo d’ ’o Mischino!
