Paggena:'E Lluce-luce.djvu/17

'A Wikisource.
Chesta paggena è stata leggiuta du' vote e mo è fernuta.
15
Core e penziero



'O BAMMINO


'Na zampogna? Natale! E nun appena
passa 'nu zampugnaro pe' 'sta strata,
chiammatelo... E facitela 'a nuvena;
facitela 'a nuvena a' Mmaculata...

C' 'a Madonna vo' essere pregata!

E nun fa niente ca 'sta gradiatella
è stretta e appesa e c' 'o palazzo è scuro.
'O zampugnaro cu' 'na ggravunella
'nce tegne 'na crucella 'nfaccia 'o muro...

Pare ca quanno trase va sicuro.

Vuie nun ascite. Nun mettite 'o pede
dint'a 'na cchiesia... 'a cinche, se' semmane.
Pare ca nun tenisseve cchiù ffede!
Saccio ca quanne sonano 'e ccampane,

nun se sanno fà 'a croce cchiù... 'sti mmane.