Gente 'e mala vita

'A Wikisource.
 EPUB   MOBI   PDF   RTF   TXT
 

[p. 1 càgna]


✴ GENTE ’E MALA
VITA ✴ DICIASSETTE
SONETTI ✴ DI ✴ FER-
DINANDO RUSSO ✴ NAPOLI
✴ L. PIERRO EDITORE ✴



[p. 5 càgna]



GENTE 'E MALA VITA




[p. 7 càgna]


FERD. RUSSO


Gente ’e mala vita







NAPOLI

LUIGI PIERRO, TIPOGR.-EDITORE

1897

[p. 8 càgna] [p. 9 càgna]

PASCALE ’E BELLO

Ron Pascalino ’e Bello, ’o vrennaiuolo,
è l’ommo ca cumanna ’a pezza sana.
Quann’ era nu scugnizzo ’e copp’ ’o Muolo
sceppava ’a jurnatella int’ ’a Rugana.

Po’, comme va? Piglia e pigliaie nu vuolo!
Luvaie d’ ’o peccato ’a Puzzulana,
’a Camorra ’o facette cuntaiuolo,
e mo’ sta ’e casa all’Aria Catalana.

Tene ’e cuppè r’affitto, ’e vuzze a mare,
’e ccase ’a Torre, ’e vacche a Margellina,
otto o riece puteche ’e farenare…

E mo’, si ha da saglì nu riputato,
Pascale ’e Bello se sceta ’e matina,
e va a fa ’e patte ncopp’ ’o Cumitato.



[p. 11 càgna]

COPPOLA-ROSSA

Gennarino Sbisà, Coppola-Rossa,
nfaccia ’a zumpata nisciuno l’appassa!
Si tene contro pure ’a truppa a massa,
tira mana, e fa sempe ’a stessa mossa.

Te mena ’a curtellata a scassa-scassa,
sott’ ’o prummone, ca te vene ’a tossa;
te fa sputà nu poco ’e scumma rossa,
te vere carè nterra e po’ te lassa.

Gennarino era ggiovane ’e chianchiere,
ma mo’ l’hanno cacciato cammurristo
pecchè è suggetto ca po’ fa ’o mestiere.

È nu canzirro troppo malandrine:
pe nu capriccio ca vo’ parè nzisto,
te va piscanno a Cristo int’ ’e lupine!



[p. 13 càgna]

MICHELE 'O CALAVRESE

Annammecato cu tutt’ ’a Ruchesca,
Michele è l’ommo ca, mo’ nce vo’ ’o fatte,
lle sì nemico? e l’ ’e fatto fà chiatte!
Te veve int’ ’a nu surzo d’acqua fresca!

’E nnammurate ’o pavano; isso ’e vatte;
po’ s’ ’e pporta ’ncampagna e fa una mmesca!
’E vvire int’ ’e ccarrozze a quatte a quatte...
M’ ’e tratta a usa crape, e ’a sera ’e ssesca.

Se jenche ’e ssacche chiene ’e muccatore,
scioglie ’e nnòreche astrente e fa renare;
po’ va ncopp’ ’o bigliardo a fa ’o signore.

Ma quann’ è ca se parla ’e se fa nnanza,
ca na femmena ’o chiamma a prutettore,
ricimmela comm’ è, ca nun s’ ’a scanza!



[p. 15 càgna]


’O STUORTO

Tene n’abbelità p’ ’o frutto ’e scasse,
ca ’o chiammano «’o papà r’ ’e mmascature.»
T’ ’o vire renzià pe sott’ ’e mmure
guardanno a uocchio ’e puorco e ghienno ’e passe.

Po’ se fremma... Fa nfenta c’aspettasse
a quaccheruno... Guarda ’e ccriature...
Se stupetea si passano signure,
surveglia ’a strata, pe chi sa, sfullasse...

Quacche sera s’attarda. Aspetta a ore:
e quann’ ’o palo l’ha fatto ’o signale,
scassa, trase, e se mette a ruvistà!

Sbacanta a una a una ’e tteratore,
s’arronza ’abbrunzo ’a rint’ ’e vernecale,
po’ lassa ’a porta aperta e se ne va.



[p. 17 càgna]

’O CAVALIERE

Comme se rice? Era na bona pezza:
pigliava a uno e n’apusava a n’ato.
Primma faceva ’o guardio ’e sicurezza,
po’, chi sa comme fuie, ne fuie cacciato.

Po’ pe na truffa jette carcerato,
ma doppo accumparette na bellezza!
Cu ’anelle ’e dete, tutto ammantecato,
chillo teneva n’anema ’e ssciurdezza!

Abbascio ’e Mprese aprette n’Aggenzia,
e doppo, arrecuglienno ’accuppatura
d’ ’o mmeglio ca putette cchiù arunà,

lassai ’ntrezzetto a tutt’ ’a cumpagnia
e squagliai n’ata vota. Appura appura,
è addeventato n’ommo ’e qualità!



[p. 19 càgna]

’O STURENTE

Sabbatiello ’o Sturente, int’ ’a Renaccia
è tenuto pe ccarna malamente!
Quann’ ’e parlato attuorno d’ ’o Sturente
’e visto giallïà cchiù de na faccia.

’O bbell’ è, c’oggiri prisentamente,
chi se fa ’o fatto suio, niente ne caccia.
S’ha da zucà ’a camorra e l’ammenaccia,
t’ ’o vire vattià pe n’ommo ’e niente.

Quann’ è ’a matina, int’ ’o Mercato ’e frutte,
cu ’a cravascella mmano e ’a sicarretta,
sponta ’o Sturente e fa: — Bongiorno a tutte!

E stu bongiorno ccà te vene a dì
ca l’ ’e ’a mpustà na lira ogne carretta,
e meza lira ’a sporta, ’o llunnerì.



[p. 21 càgna]

SCIASCILLO

’O cchiù cuieto. Riccio ’e capellera,
doie spalluzzelle secche e scuntraffatte,
nu mustacciello a pile ’e spiche. Nera
’a petena r’ ’a faccia e ll’uocchie ’e gatte.

Rorme ’a matina ma fatica a sera,
t’ ’o vire arriva ’ncuolle a ll’antrasatte.
T’ha da venì a truvà? Vene ’e carrera!
Te ra’ na base, e chill’è affare fatte.

Nun parla, nun se ntrica, nun fa mosse;
te rice: — Jate llà! — Quann’ ha ritt’isso,
’o butto è scicco, songo morza grosse.

Nun s’appicceca mai, nun ammenaccia,
ma quanno mena ’e mmane int’ ’a n’aggrisso
tene ’o paccaro nzisto, a ntorzafaccia.



[p. 23 càgna]

« ’ONNA TERESINA »

Si parla, parla tutto affemmenato;
chiàmmalo bello, e chillo quase svene...
Porta ’o bracciale, tene ’o nnammurato...
È malatìa, che ssà, chella ca tene!

Dille c’addora ’e musco ’e ll’ ’e priato,
falle nu surdiglino, e chillo vene.
È cellecuso, e si sta risturbato,
sputa cu nu risgusto, comm’ ’e pprène.

’O ccert’ è ca se fraveca ’e russette,
se tegne ll’uocchie cu na ggravunella,
tene ’a cammisa ’e seta cu ’e merlette.

Rire sempe, cu ’a gente mmiez’ ’a via,
e porta ’a carza rosa e ’a scarpinella
cu ’a nocca ncoppa e ’o tacco a fantasia.



[p. 25 càgna]

CARMENELLA

Chill’uocchie nire ’e Carmenella mia
te nchiuvàvano ’a gente a ciente passe!
E chella vocca! Era na frenesia!
C’addore e che sapore d’ananasse!

Io mo’ vulesse ca s’allicurdasse
quann’ ’a scuntraie arreto a Vecaria!
Vurrìa vedè si se ne ridarrìa
comm’a tanno, e si ancora arrepassasse!

E si tanno ’a sparaie ma n’ ’a cugliette,
e m’arrestàino mpont’ ’o vecariello
pe causa ch’ero ancora nu guaglione,

mo’ pe sfregio, pe sfizzio e pe dispiette
m’ ’a guardasse cu ll’uocchie a zennariello
e lle facesse ll’atto c’ ’o bastone.



[p. 27 càgna]

’A ZEPPULAIOLA

Tant’anne fa, quann’era viva ’a nonna,
Cannetella era ancora ’n capa nenna;
teneva na faccella tonna tonna,
era cchiù bella e leggia de na penna.

De na rusella pareva na fronna,
cu nu cunfietto faceva marenna;
mo’ si ’a vedite, mannaggia a culonna,
pare ngrassata cu cucozza e vrenna.

Culetta ’a chiatta m’ ’a mettite ’e parte:
Cannetella è tre vote a Sandunato!
Venne ’o baccalà fritto dint’ ’a carta.

Ha truvato a nu tale e s’ha spusato;
’a sera ’o vatte: fanno sempe un’arta!
Ma a tutt’ ’e dduie ’e vvatte ’o nnammurato.



[p. 29 càgna]

« ’A MARCHESA »

Quann’ ’a canuscev’io, Nannina Schiano
jeva cu ’e scarpuncielle rutte ’o père,
steva cu ’a suvarara int’ ’e Lanziere
e lle putive dà nu soldo mmano.

’O pate era nu malo crestiano,
faceva tutte ll’arte, c’ ’o penziere,
ma jeva bello sulo a fa ’o mestiere
d’arrubbà ’a gente mmiezo san Gaitano.

Doppo tant’anne ca ’e pperdette ’e vista,
mo’ aggio saputo ch’isso sta ngalera;
essa tira carrozza e fa l’artista.

Parla sciò-sciommo, dice ch’è frangesa,
tene tre serviture e ’a cammarera,
addora ’e musco e ’a chiammano ’a Marchesa.



[p. 31 càgna]

’A SCHIAVETTA

C’ ’o carofano russo int’ ’e capille
è guappa e geniale ’a ggravunara;
t’appiccia dint’ ’o core na carcara,
te n’arrobba suspire, a mille a mille!

Tene nfronte na schiocca ’e ricciulille
ca me pareno ’e crocche d’ ’a vurpara,
e mpont’ ’o musso chilli duie pelille
vanno cinquanta pezze a centenara.

E pure chesta bella femmenona
ca putarrìa dà sfizzio a tanto ’o chilo,
ha perza ’a pace soia pe na guagliona.

S’ ’ha tene rint’ ’a casa ribazzata
e se ne sta scennenno mpilo mpilo...
Va trova c’hann’ ’a fa, ll’una cu ll’ata!



[p. 33 càgna]

’A MPIGNATORA

Quann’ ’o sabbato ’o juorno ’onna Carmela
va attuorno arrecuglienno, uh mamma mia!
’A gente se giallèa comm’ ’a cannela!
Chella ve fa venì na malatia!

’A Rossa ha da scuntà na pezza ’e tela
e pava ’o sango suio; ronna Lucia
ha da scuntà na vesta; ’a siè-Michela
l’ha da rà tanto e tanto ’e sanzarìa...

’A mpignatora, tutta ncannaccata,
vicino ’e qquatte a vide già spuntà
cu l’ommo appriesso ca lle fa ’a cuntata.

Arrecoglie e s’ ’o ssegna int’ ’a libbretta,
ma quanno vère ch’ è mal’aria e bà
caccia ’a spatella ’a rint’ ’a na cazetta...



[p. 35 càgna]

’O MPUOSTO

I.

— Signori belli... Santanotte attuorno!
— Salutammo, Pascà! Nu rito ’e vino?
— Avisseve veruto a Tore ’e Cuorno?
— Mò è sciuto... Ha ritto jeva ccà vicino.

— ’O sto ghienno truvanno ’a miezoiuorno...
— E chillo ha da turnà... Sta cu Peppino....
— Chi Peppino? — Peppino ’e Zi-Taluorno,
’o caiunzaro, chillo r’ ’o Pennino...

— Si torna, me facite na finezza?
Lle ricite accussì ca Pascalotte
tene ’a mmasciata ’e Nanninella Frezza...

Chillo capisce e ghiesce... E grazzie tante...
Signori mieie, ve lasso ’a santa notte!...
— Fa malu tiempo! ricette ’o Sfriggiante.



[p. 37 càgna]

II.



Pascale ascette. Doppo quatte passe
se sentette nu fisco ’e canuscenza.
Nun rispunnette: se facette ’a rasse
ma senza niente perderse ’e prisenza.

Na voce lle dicette c’aspettasse:
— Ron Pascalì... nu poco e cumpiacenza...
Po’ ’a rint’ ’o scuro, menanno ’o cumpasse,
spuntaie ’o Stuorto... Cammenava ’e renza.

Appriesso ’o Stuorto n’ati sse’ perzune
senza manco sciatà se fanno sotto
cu ’e mmane rint’ ’e ssacche d’ ’e cazune.

— Scusate, giuvinò... na parulella!...
— Manco meza, pe cierti carugnune!...
Chi vo’ parlà, tirasse ’a livurdella!...



[p. 39 càgna]

III.

E s’accustava. Ma na botta secca
se sentette int’ ’o viculo sulagne;
po’ gente che scappava ’a parte ’a Zecca,
e dint’ ’o scuro accumminciaie nu lagne.

— Aiuto! So’ Pascale ’a Pignasecca...
Songo stato... sparato d’ ’e cumpagne...
’Ntanto n’ommo arrivava int’ ’a Ggiurecca
e sbatteva ’a purtella appriesso ’e Bagne.

— Nannì, Nannì! — Chi è? Stammo rurmenno!
— Nannì!... — E chi site?... Ma ricite o nomme...
— Rapre, ca Pascalotte sta murenno!...

Se sentette nu strillo risperato,
e pe mmiezo ’a Ggiurecca ’e passe ’e st’omme
ca s’ ’a sfelava comm’a nu dannato!



[p. 41 càgna]

« ’O BELLO GUAGLIONE »

— Mo’ vene Pasca!... Limungella fresca!
Aggio penzato ca vogl’ ’ì a fa Pasca
a ddu Catarenella int’ ’a Ruchesca!
Tras’ int’ ’o palazziello e faccio ’o fisco.

’A ronna ca nun pava, io n’ ’a capisco!
L’ommo fiura e ’a nnamurata allasca!
Se sape! Embè, cher’ è, mo’ vene Pasca,
e pozzo appiccià ’o ffuoco senza ll’esca?

Llà quacche cosa pure me l’abbusco:
na fumatella int’ ’a na pippa lasca,
’o casatiello, ’o miezo litro nfrisco,
na cinco-lira e nu poco ’e ventresca!

Catarenella, ’a n’anno c’ ’a canosco,
empe e quanto songh’ io, m’ aiza ’a frasca!



[p. 42 càgna]

Embè, quanne so’ stato a San Francisco
n’ aggio sempe sparato ’o meglio masco?

’O capo-guardiano ’on Peppe Fusco,
chillu bell’ ommo cu ttanto na mosca,
quanno passava, me faceva ’a rasca...
Quant’ era scemo, e quant’ ’o cumpiatisco !



[p. 44 càgna]


Centesimi 50.