Chesta paggena è stata leggiuta du' vote e mo è fernuta.
PASCALE ’E BELLO
Ron Pascalino ’e Bello, ’o vrennaiuolo,
è l’ommo ca cumanna ’a pezza sana.
Quann’ era nu scugnizzo ’e copp’ ’o Muolo
sceppava ’a jurnatella int’ ’a Rugana.
Po’, comme va? Piglia e pigliaie nu vuolo!
Luvaie d’ ’o peccato ’a Puzzulana,
’a Camorra ’o facette cuntaiuolo,
e mo’ sta ’e casa all’Aria Catalana.
Tene ’e cuppè r’affitto, ’e vuzze a mare,
’e ccase ’a Torre, ’e vacche a Margellina,
otto o riece puteche ’e farenare…
E mo’, si ha da saglì nu riputato,
Pascale ’e Bello se sceta ’e matina,
e va a fa ’e patte ncopp’ ’o Cumitato.
7
