Divina Commedia (Napulitano)/9
Lo colore che nfaccia a mme venette
Vedenno llà a Vergileo che tornava
Fice sì che lo sujo le scomparette.
Comm'a uno che sente, se fermava,
Che l'uocchie non potea manco girare
Pe l'aria nera, che cchiù se scurava!
Pure la guerra avimmo a guadagnare
Comme volimmo, allora isso parlaje,
Ma ntanto ccà nisciuno sta a arrivare!
Vedette buono comme accommenzaje
Co l'autro che doppo pò venette,
Parlanno comme primma non parlaje.
Ma sto parlà paura assaje mme dette,
Ca la parola me stentava, e addonca
De sentì peggie cose mme credette!
Dinto a sto funno de la trista conca
Da lo piano ch'è primmo, fuorze scenne
Chi à pe pena la speranza cionca?
E chillo a mme: raro è che se'ntravene
Quarcuno faccia a faccia ccà co nuje,
Pe sto cammino ccà che nce mantene.
Vero è che n'autra vota io ccà nce fuje
Da la Maga Aritone scongiurato,
L'ombra chiammanno de li cuorpe suje,
Da poco io poveriello era spirato
Ch'essa mme facette ì nfra chillo muro,
No spireto azzò avesse llà pigliato.
Chill'è no luoco vascio, affritto e scuro
E cchiù lontano da lo primmo Cielo
Ma mperò lo cammino nn'è sicuro!
Sta paluda che puzza, e ch'è de jelo,
Sta attuorno a la Cetate piccïata,
Addove non se trase senza felo.
Mme disse n'autra cosa, ma scordata
Me l'aggio, pecchè l'uocchio llà guardava
Ncimma a la torra tutta arroventata!
E mentre stea a lo meglio io smicciava
Tre furie e ognuna era de sango tenta
E fejura de femmena portava!
E co cape e serpiente facea fenta
De portà li capille a rrammagliette
Addò la fronte steva bona strenta.
Ma chillo appena che lle canoscette,
De Proserpena serva, la dannata,
Guarda lle brutte Arinne, mme dicette.
Chella è Megera, e se fa na cantata,
Chella che chiagne llà vicino è Aletto,
Tesifona è la terza 'nfuriata.
Co ll'ogne ognuna se sceppava 'mpietto
E apprause facenno, e strille tale,
Da fareme trasire no sospietto.
Venga Medusa, e pena non ce vale,
Chesto diceano pe sputare tunno,
A vennecà Teseo fecemo male!
Vòtate arreto, e tiene l'uocchio 'nfunno,
Ca si Medusa lloco te vedesse,
Non se potria tornare cchiù a lo munno!
Lo Masto mio doppo ste cose stesse
Non se fidaje cchiù manco de ste mmane,
Si primma l'uocchie isso non me nchiudesse!
O vuje ch'avite li jodicie sane,
Guardate comme priesto s'annasconne
Chesta lottrina sotto a vierze strane.
E già veneva ncoppa de chell'onne
No fracasso de suono de spavento,
Che faceva tremmà tutte le sponne,
E fatto solamente da no viento
Forte pe tanta specie de calure
Che lo vuosco feresce a lo momento.
Li rame schianta, e fa cadè li sciure
E se jenche de porvere la farda,
E fa fujì le ffere e li pasture.
L'uocchie m'aprette, e me dicette: Guarda
Mo chella scumma antica addò s'atterra
Chillo fummo che a ascire maje non tarda,
E comm'a lle rranocchie lle fa guerra
La nnemmica, pe l'acqua tutte quante
Se nne vanno, e retornano a la terra.
Cchiù de mill'arme vedde nfra li chiante
Fuire nnanze a uno, ch'a lo passo
Passava Stige asciutto co le cchiante.
Da la faccia movea lo viento grasso,
Movenno la senistra nnanze spisso,
Facenno a chillo fatto no fracasso.
M'addonaje che n'Angiolo era chisso
Io guardaje lo Masto, che ordinaje
A me acalà la capo nnanze a isso:
Chìno d'arraggia attuorno isso guardaje
E llà na porta co na bacchettella
Aprette friddo friddo e non parlaje
Cacciata da lo Cielo gente fella
Sotto a la porta fice sta parlata,
Pecchè mò commannate a barda e a sella?
E contro a chella voglia mmalorata
Vaje e lo fine d'essa te dà 'mpaccio,
Mentre dolore accresco a meza strata?
De lo destino pecchè fa no straccio?
Cerbero tujo te recordo ancora
Che spelato nne porta lo mostaccio.
A n'autra strata se votaje allora,
E non parlaje a nuje, ma fegnette
De guardare cchiù gente da llà ffora,
Ca chella de chi nnanze lle venette:
E nuje jettemmo a ffianco a chella terra,
Sicure pe li mutte che dicette.
Dinto trasimmo, senza fa na guerra:
E io ch'aveva voglia de guardare
Li tormiente ca la fortezza nzerra,
Trasenno, l'uocchio steva llà a girare,
E veco ad ogne mano na campagna,
Addò nc'è chianto, che fa spaventare,
E comme ad Arli addò Rodano stagna
E comm'a Pola a fianco a lo Quarnaro,
Che chiude Italia, e 'mponta pò l'abbagna.
Li sepulcre e lo luoco lloro caro
Accossì ccà faceano d'ogne pparte,
Ma co no muodo ch'era assaje cchiù amaro.
Che ntra lle fosse sciamme erano sparte
E stevano accossì cheste appicciate,
Che de lo ffierro nn'era troppa l'arte!
Stevano sti sepulcre scopirchiate,
E ascevano da llà cierte lamiente
D'aneme affese, affritte, e sconzolate.
E io: Sio Masto, chi so chelle ggente,
Ch'atterrate che ssò, da llà te fanno
Sentire sti sospire assaje affriggente?
L'Aresiarche, disse, llà nce stanno
Co li compagne lloro, e da sto lato
Cchiù chiene ccà lle ffosse se farranno,
Simmelo e simmelo ccà stace atterrato,
Onne la fossa ccà s'è fatta peva:
E a la deritta mano pò votato,
Jettemo addò li martere vedeva.