Divina Commedia (Napulitano)/28
Chi potarrìa maje co le pparole
De lo sango e le cchiaje mo ccà parlare
Che vedette io, si contà se pote?
Ogne llengua starriamo a 'ntartagliare,
Pe la parlata nosta e pe la mente,
Ca niente potarriano ancappare.
Si s'aunasse ccà tutta la gente
Che già ncopp'a la fortunata terra
De Puglia de lo sango fuje fetente.
Pe li Romane, e pe la longa guerra
Che tante anielle fujeno pigliate
Comme Livio scrive, e cchiù se mperra,
Co chella che sentette de mazzate
Pe contrastare a Lobberto Guiscardo,
E l'autra ch'avè ll'ossa già atterrate
A Ceperano, addove fuje bosciardo
Ogne Pugliese, e llà da Tagliacuozzo
Addò senz'arme nce vincette Alardo;
E si s'ammostano ossa rotte a mmuozzo,
Non se potria contà comm'era rotta
E sporca assaje sta borgia 'nchillo cuozzo.
Già vedeva accossì na meza-votta,
E vedette uno accossì spertosato
Rutto da nfaccia e mpietto 'nfino a ssotta.
Da fora le stentine avea sto sgrato,
La coratella, e ppò lo ventriciello
Addò lo strunzo stace arreparato.
Mmentre che bbeco io chisto poveriello,
Mme guarda, e co lle mmane apre lo pietto,
Dicenno: Mo mme spacco, guarda bello:
Vi comm'è stroppiato mo Mametto;
E nnanze a mme già va chiagnenno Alì,
Rutto nfaccia e a la fronte, e nn'à arricietto.
E tutte chiste che tu staje a ssentì
Scànnalo a ddare stettero a lo munno,
Fujeno vive, e mperò rutte accossì.
No diavolo è ccà che ttaglia ntunno
Accossì crudo, comme taglia spata
Vattenno a tutte quante 'ncimma e a ffunno.
Quanno votajemo llà pe chella strata
Pe lo che lle fferute songo 'nchiuse
Primma ch'autro va nnanze e ppò risciata.
Ma tu chi sì che staje nfra sti vavuse
A mmusso strinto pe non ghì a la pena
Ch'è ghiodecata pe le ttoje accuse?
Nè la morta, nè corpa ccà lo mena
Risponnette lo Masto, a carfettarlo,
Ma la sperienzia pe nce dare chiena,
E io che muorto songo aggio a portarlo
Pe lo nfierno da ccà sempe giranno
E chesto è overo comme io mo te parlo.
Cchiù de ciento lo stettero ascotanno,
Se fermajeno nfuosso llà a guardarme
Pe mmaraveglia tutto llà scordanno.
Dì a Fra Dorcino mo che priesto s'arme,
Tu che fuorze lo Sole vedarraje
Si isso ccà cchiù non vole secotarme,
De magnare, e Novara nfra li guaje
Vittoria non avrà senza arriciette,
Ca si no llà non s'arrennarrà maje.
Pò ca no pede a ghì da llà movette
Mametto mme dicette sta parola,
E pò a partirse nterra lo stennette.
N'autro ch'avea feruta ncannavola
E ammozzato lo naso anfì a le cciglia,
Teneva a chesto ccà na recchia sola,
E restato a guardà, pe mmaraviglia
Co ll'autre nnanze nce arapìe la canna
Ch'era a ogne parte comm'a la vermiglia,
Dicette: Oje tu che corpa non condanna,
Che vedette ncoppa' a terra latina,
E sì la somiglianzia non me nganna,
Ricordate de Pietro Mmedicina,
Si maje tuorne a vedè lo doce chiano
Che a Marcabò e Verciello s'abbecina.
E ffà sapè a li duje meglie de Fano
A Guido e ad Angiolillo bello bello
Che, si lo prevedè ccà non è vano,
Jarranno fora llà da lo vasciello
Menate a mmare mmiezo a la Cattoleca,
Pe trademiento de tiranno fiello.
Nfra l'isola de Cipria e de Majoleca
Non vedde tale fatto maje Nittuno,
Non da Pirate, nè da gente Arcoleca.
Lo traditore d'uocchie nne tene uno,
Tene la terra ch'è co mmico, e attiento
Essere de vedè vorrìa diuno.
Farrà venirlo co isso a parlamiento,
Pò farrà che a lo viento de Focara
Non se cercarrà ajuto overo a stiento.
E io a isso: Ammostame e dichiara
Si vuoje che de tte nova io stesse a dare
Chi è llà mo chillo co a faccia amara?
La mano a la mascella sta a portare
De no compagno e l'arape la vocca,
Strellanno: Chisto è isso, e nn'à a parlare.
Chisto, cacciato, tutto llà s'ammocca
E Cesare passaje lo Rubbicone,
Capenno che aspettà non sempe 'nzocca.
O comme mme pareva tremmolone
Co la lengua tagliata accossì porca,
Chillo gran faccio-tuosto Curione.
Co le mmane tagliate autro da forca
Le braccia aizava pe chell'aria fosca,
E lo sango facea la faccia sporca;
Strellaje: Porzì allicordate de Mosca
Che dicette capo à la cosa fatta,
Che fuje lo mmale de la gente trosca.
E io dicette: È morta la toja schiatta,
E isso se nne jette addollorato
Comm'a perzona pazza, trista e sfatta.
Ma io restaje a guardà lo vicenato
Vedenno cosa ch'avarria paura
De contà sulo, tanto m'à stonato;
Si non che la coscienzia m'assicura
La bona compagnia de l'ommo franco,
Che se sente nnocente e sta sicura,
Vedette, e pare ancora a vedè ammanco
No cuorpo senza capo lesto jire
Comme d'ire llà ognuno nn'era stanco:
La capo mmano avea, non se pò dire,
Appesa comme fosse na lanterna,
E nce guardava, e steva cchiù a soffrire.
D'isso faceva a isso da lucerna,
Erano duje co uno, e uno a dduje,
Cosa che sape Chillo che governa.
Quanno a lo ponte llà deritto fuje
Lo vraccio aizaje, la capo ammalappena,
Pe dirce llà chelle pparole suje,
Che fujeno: Vide ccà che brutta pena
Tu, che spiranno vaje vedenno muorte,
Vide si nc'è mo simmela sta scena;
E pecchè tu de me nova nne puorte
Sacce che so Bertrammo, e non scordare,
Che a Rre Giovanne dette li confuorte.
Patre e figlio fice io pò rebbellare
Achitofello stette ad Assalone
E a Davidde male a cconzigliare.
E avenno io fatto male a ste pperzone,
Non porto cchiù la capo, sbentorato,
Da lo prencipio ch'è nfra sto troncone,
E accossì sconto mo chisto peccato.