Divina Commedia (Napulitano)/26
Guode, Sciorenza, mo che ssì già granne,
Che pe mmare e ppe ttera sempe saglie,
E a lo nfierno lo nomme tujo se spanne.
Trovaje cinco latrune, ma de vaglie
Nfra Sciorentine, e scuorno io sto a provare,
E annore nfaccia a tte perzò non saglie.
Ma si lo vero non se sta a ssonnare,
Tu priesto sentarraje pe chesta via
Zzò che Prato co autre sta a cercare:
E si già fosse, a ttiempo non sarria.
E già ch'à da venì, venesse priesto;
Ch'accossì mo nò cchiù nce penzarria.
Nuje partimmo da llà dicenno chesto,
E ncoppa a gradiate non cchiù sane,
Saglie primma lo Masto, e io pe riesto.
E cammenanno pe sta via cchiù cchiane,
Nfra le scarde e le pponte de lo scuoglio,
Avimmo d'ajutarce co le mmane.
Allora mme dolette, e mmo mme doglio,
Quanno a cchello, io cchiù penzo, che vedette,
E cchiù frenà lo ngegno mio non boglio.
Azzò che vertoluso cchiù se mette
Sì che sì stella bbona o meglia cosa
M'à dato bene, io stesso me l'accette.
E quante lo cafone ch'arreposa
Ntramente che lo Sole sta lontano
Co la faccia da nuje ch'àve annoscosa,
Comme na mosca cede a lo tavano,
Vede li luce-luce, e accossì steva
Addò sta co vennegna e zzappa mmano.
De tanta sciamme tutta llà luceva
L'ottava borgia, comme mm'addonaje
Quanno fuje addò funno mme pareva.
E ccomm'a chi co ll'urze se spassaje,
D'Elìa lo carro vedette partire,
Che 'nCielo co ccavalle cammenaje.
Ca non poteano ll'uocchie appriesso jire,
Che sola sciamma jesse llà guardanno,
Comm'a na nuvolella a lo ssaglìre;
Se moveva ogneduna accossì ttanno,
Pe lo fuosso, e nisciuno anema ammosta,
No peccatore ogne sciamma va stanno.
Steva io a bbedè a lo ponte 'nfaccia tosta
E si llà non me fosse pò tenuto,
Sarrìa caduto abbascio a una posta.
Lo Masto mme vedette zitto e mmuto,
Dicette: Dinto a ffuoche so li spìrete,
S'appiccia ognuno a lo ffuoco che à avuto.
Sio Masto mio, dicette, pe sentìrete
Songo io cchiù ccerto, e già mm'era d'aviso
Che accossì fosse, e già voleva dìrete:
Chi è dinto a lo ffuoco accossì acciso
Da ncoppa, e ppare ascì da chella pira,
Addò Etriocro e lo frato fuje miso?
Risponnette: Lla ddinto se martira
Aulisse e Diammede, e nziemme p'uso
Corrono a la vennetta, comm'a ll'ira;
Dinto a la sciamma lloro sta annascuso
Chillo cavallo che ffice la porta
Pe ffà ascì lo Romano primma nchiuso.
Chiagneva dinto l'arta, pecchè morta
È Deadamia e se dole d'Achille,
E de Pàllate pena ve se porta.
Si ponno dinto da chelle sfaville
Parlà, dicette, Masto, te ne prejo,
Pe quanto lo prejà vale pe mmille,
De non volè aspettà, non te l'annejo,
Nzì che na sciamma ccà porta primera,
Vide che a essa pe ggolìo mme chiejo.
E isso a mme: è degna sta prejiera
D'essere laudata, e io l'accetto,
Tiene mperò la lengua a sta manera.
Lassa parlare a mme, ch'io tengo pietto,
Saccio che bbuoje, e lloro so sdignate,
Ca fujeno Griece senza avè arricietto.
Già che la sciamma mo stà ccà a sti late
Addò a lo Masto pare a ttiempo e a lluoco,
Lo sentette parlà nfra li peccate:
O vuje che ssite duje dinto a no fuoco,
Si mmeretaje da vuje mmentre che stette
Nvita, e mme mmeretaje o assaje o poco,
Quanno a lo munno li vierze screvette,
Non ve movite, uno 'mperò mme dica
Addò p'isso perduto a morì jette.
Lo gruosso cuorno de la sciamma antica
Accommenzaje a ccadè, mormorianno,
Comm'a cchella che viento nce affatica;
E ppò la cimma, ccà e llà menanno,
Comme fosse la lengua che parlasse,
Jettaje voce da fora e disse: Quanno
Mme partette da Circe che li spasse
Mme dette cchiù de n'anno llà a Gaeta,
Primma ch'Anea nce ll'annommenasse;
Nè dducezza de figlio assaje cojeta
De lo patre, e nè debbeto d'ammore
Che a Pènerope aveva a llevà seta,
Potettero accramareme l'arzore,
Quanno venette da lo munno spierto,
E pe li vizie umane, e pe valore;
E mme mettette pe lo mare apierto,
Co una varca e co chella compagna
Piccola, e nò nce fuje manco desierto.
E vedette porzì tutta la Spagna,
Lo Marrocco e ppò l'isola de Sarde,
E l'autre nchillo mare che l'abbagna.
Io e li mieje èramo viecchie e ttarde,
Quanno venimmo a Gibirterra stretta
Addò Ercole menaje mazzate e scarde,
Azzò che l'ommo nnanze non se jetta:
A la deritta mme lassaje Sebilia,
Da l'autra già m'avea lassata a Setta.
O Muonece, dicette, cientomilia
Vota vuje site state a ll'occidente,
A chesta piccerella de vegilia
De senze vuoste, che lo rummanente
Non avite anniare la sperienzia
Che arreto nn'à lo Sole munno e ggente.
Considerate vuje la quintassenzia,
Non fusteve criate comm'a bbrute,
Ma pe ssapè vertute e ccanoscenzia.
Io li compagne lli facette acute,
Co ste pparole meje, pe lo cammino
Ch'appena appena l'avarria tenute.
E votata la poppa a lo mmatino
Che volanno volanno nuje vocammo,
Jenno sempe a lo lato de mancino.
Tutte le stelle 'nCielo nuje guardammo
Da no polo, e lo nuosto è cchiù avasciato,
Che a llinia de lo mare nuje non stammo.
Cinco vote appicciato, e ppò stutato
Lo llustro steva sotto de la luna,
Trasenno 'nchillo luoco tanto aizato.
Quanto compare na montagna bruna
Da lontano, e pareva auta tanto
Quanto io vista non n'aveva nisciuna.
Nce rallegrajemo e se tornaje a lo chianto,
Che da terra no viento nce sciosciaje,
E a la varca scassaje lo primmo canto.
Tre bbote attuorno a ll'acqua lo ggiraje,
A la quarta lo viento jette 'mpoppa,
E la prora pò abbascio se nforchiaje,
Nfì che lo mare a nuje saglie da ncoppa.