Divina Commedia (Napulitano)/25
A la fine de chesto ccà lo Latro
Stette lesto le mmane ad aizare
Strellanno: Leva, Dio, ch'a tte le squatro.
Mmiezo a li sierpe avette io sempe a stare.
E uno attuorno a isso s'acchiappaje,
Comme dicesse: Cchiù mo non parlare.
N'autra a le bbraccia nce se 'ntorcigliaje,
Toccanno capo e ccoda llà essa stessa
Fice che chillo cchiù non se votaje.
Ah, Pistoja, e pecchè non buò de pressa
Mo ncennerirte tanto che non dure,
Mo che la mala ggente te fa sguessa?
E pe li luoche de lo 'nfierno, scure,
Co Dio superbia tanta non vedette,
Nè a chi cadette a Tebbe pe le mmure.
Tanno senza parlà se nne fujette,
E io vedde no Cientauro arraggiato
Strellare: Addove stace? e non se stette.
E tanta sierpe nn'à lo Maremmato
Quanto isso nne teneva pe la croppa,
Da la capo a li piede lo scasato.
Ncopp'a le spalle addereto a la coppa,
Co scelle aperte steva llà no Draco,
E chillo affoca chi pe llà se 'ntoppa.
Lo Masto mio dicette: Chillo è Caco,
Che pe sotto a lo Monte d'Aventino
De sango fice scorrere no laco.
Co li frate non và pe no cammino,
Pe l'arruobbo da isso stesso fatto
De le ppècore avute da vicino;
Fenette d'arrobbà sto scontrafatto
Quann'Ercole co mazza fice aggrisso,
Co cciento bbotte te lo fice fatto.
Ntramente se parlava, e corrette isso,
Tre spìrete venettero, ed è troppo,
Da lo Masto non viste e mme spamisso.
Strellajeno: Chi site? e io cchiù non ntoppo,
E nzieme co lo Masto priesto priesto
Li ntennettemo a lloro pure doppo.
Io non li ccanoscea, ma lloro lesto
Comm'uno secotà vole pe ccaso
E àve da parlare de lo riesto.
Dicette: Cianfa addò sarrà rummaso?
Ca io, azzò lo Masto stesse attiento,
Lo dito stenno ncoppa de lo naso.
Si tu che liegge cride tutto a stiento;
Si mme siente non farte maraviglia,
Ch'io stesso ch'aggio visto non conzento.
Nfaccia a lloro io teneva llà le cciglia,
No serpe co sseje piede già se lanza
Pe nnanze a uno, e tutto se 'ntorciglia.
Le ttene co tre ppiede llà la panza,
E co ll'autre le braccia le strignette,
E ppò nfaccia lle dette de paranza.
Lo culo nfra le ccoscie lle stennette
E la coda nfeccaje da llà 'ntostata,
E pe li rine pò nce la stennette.
Maje èllera a le mmura fuje attaccata.
Comme fece sta serpentina fera,
Quanno nce s'azzeccaje comm'a ccera
Se ficero, e mmiscajeno lo colore,
Nisciuno cchiù pareva chello ch'era.
Comme va nnanze pe lo gran calore
La carta de papirio 'ncolor bruno,
Che non è nera ancora e ghianca more.
Ll'autri duje guardavano e ogneduno
Strellava: Aniello mio comme te mmute!
Vide che già non si nè duje, nè uno.
Le ddoje cape erano una addevenute,
Quanno ascettero ddoje fiure miste
Co una faccia co dduje tutte perdute.
Le doje braccia llà fujeno pò miste,
Le ccoscie co le ggamme e co lo pietto,
Addeventajeno cose non maje viste.
Era n'assulo fatto da duetto,
De tutte duje nisciuno affijurava,
E ghievano, ma senza avè arricietto.
Comm'a serne lo luoco suio cagnava
Ntiempo de stata, jenno a n'autro giro,
Correnno comm'a ffùrmene, abballava.
Llà n'autro serpetiello nchillo tiro
Nfaccia a la panza de li duje zompaje
Comm'aceno de pepe forte e nniro.
E lo stommaco lesto spertosaje
A l'uno de li duje trasenno stritto,
Pò nterra stiso llà s'abbannonaje.
Lo feruto guardaje, ma stette zitto;
Anze arapea la vocca soja fetente
Si volesse addormirse stanco e affritto.
Isso e lo serpe se teneano mente,
Chillo 'nferuta, e l'autro pe la vocca,
Fumavano, e lo fummo è aunitamente.
Stette zitto Lucano addò se tocca
De Sabiello e porzì de don Nassidio,
E mmo sentesse chello che se scocca.
E de Càddema, Aretuso e don Avidio;
Ca si uno a sserpe e l'autra a ffontana
Commerte, poitanno, io non lo mmidio;
Che a fronte a fronte la natura umana
Non trammutaje, ca po' da chesta fera
Potesse sta a cagnarse, e farse sana.
Nzieme stevano llà de sta manera,
E lo serpe a la coda dà 'ncasate,
Ca lo feruto coda già già era.
Le ggamme co le ccoscie già acceccate
Stevano tanto, ca po' la ggiuntura
Non cchiù pareva, e siente che sformate.
La coda commigliava la fijura
Che se perdeva llà, ca chella pelle
Se facea molla, e chella da llà addura.
Trasettero le bbraccia pe le scelle,
E la fera li piede curte suje
Allongava quant'accortava chelle.
Li piede arreto doppo, e nziemme fuje,
Lo membro addeventajeno che se ncrosca,
Lo misero n'aveva puoste duje.
E lo fummo ntramente chille affosca
Cagnanno lo colore, e ppile ascenno
Da na parte, da ll'autra llà li sbosca,
Se sosette uno e l'autro jìe cadenno,
Non evanno mperò ll'uocchie a le bbocche,
E lo musso cagnanno e ppò torcenno.
Lo deritto tiraje l'autro a e cchiocche,
E da troppa materia che nce ascette,
Lle rrecchie fice ascì comm'a ddoje nocche.
Zzò che non ghiette arreto e llà se stette,
Da lo sopierchio ascìe lo naso nfaccia,
E, li musse 'ngrossaje, comme vedette.
Chillo nterra lo musso nnanze caccia,
Le rrecchie tira pe a capo, e chesta,
Comm'a mmaruzza da la scorza affaccia;
E la lengua ch'avea aunita e llesta
Primma a pparlà, se rompe, la forcuta
Se nchiude a l'autro e cchiù lo fummo resta.
Ll'anema, ch'era fera addevenuta,
Zufolianno lesto llà scappaje,
E l'autro arreto va parlanno, e sputa.
Le nnove spalle appriesso ll'avotaje,
Dicenno: Io voglio che Buoso corresse
Comm'a mme, che pe tterra mme strisciaje.
Fice sì che savorra io llà vedesse
Mmutare e ppò mmutare, e ccà me scusa
La novità, si sciore non me desse.
E già che chesta vista mia confusa
Se fosse poco, e stesse io llà smaccato,
Li duje fuì non pottero de 'nchiusa,
Ch'io non vedesse a Puccio lo sciancato;
Chillo sulo era de li tre compagne
Che erano primma, e non era mmutato;
L'autro era chillo che Gaville chiagne.