Paggena:La Divina Commedia Napoletano Domenico Jaccarino-Nfierno.djvu/110

— 112 —

CANTO VINTICINCHÈSEMO ARGOMIENTO

Doppo d'esserse Fuccio sdignato contro a Dio, se nne scappa. Dante vede a Caco fatto a fforma de Cientauro ntorcigliato da na gran quantetà de derpiente ncopp'a le spalle, portanno pure a no Draco. A la fine ncontra tre spirete de Sciorenza, duje de li quale nnanze a isso maravigliosamente se trasformano e addeventano una cosa sola.

A la fine de chesto ccà lo Latro
Stette lesto le mmane ad aizare
Strellanno: Leva, Dio, ch'a tte le squatro.
Mmiezo a li sierpe avette io sempe a stare.
E uno attuorno a isso s'acchiappaje,
Comme dicesse: Cchiù mo non parlare.
N'autra a le bbraccia nce se 'ntorcigliaje,
Toccanno capo e ccoda llà essa stessa
Fice che chillo cchiù non se votaje.
Ah, Pistoja, e pecchè non buò de pressa
Mo ncennerirte tanto che non dure,
Mo che la mala ggente te fa sguessa?
E pe li luoche de lo 'nfierno, scure,
Co Dio superbia tanta non vedette,
Nè a chi cadette a Tebbe pe le mmure.
Tanno senza parlà se nne fujette,
E io vedde no Cientauro arraggiato
Strellare: Addove stace? e non se stette.
E tanta sierpe nn'à lo Maremmato
Quanto isso nne teneva pe la croppa,
Da la capo a li piede lo scasato.
Ncopp'a le spalle addereto a la coppa,
Co scelle aperte steva llà no Draco,
E chillo affoca chi pe llà se 'ntoppa.
Lo Masto mio dicette: Chillo è Caco,
Che pe sotto a lo Monte d'Aventino
De sango fice scorrere no laco.