Divina Commedia (Napulitano)/20
Ancora vierze aggio da fa pennate
Pe scrivere potè chist'autro canto
Primma canzona d'aneme dannate.
Io steva già dispuosto tutto quanto
A guardà a lo scopierto chillo funno
Che se 'nfonneva de spremmuto chianto!
Vedette gente a lo vallone tunno
Venì zitto chiagnenno a passo lento,
Che fanno letante a chisto munno.
Comme io steva cchiù abbascio e steva attiento
Mme pareva ch'ognuno era 'mbrogliato
Da la faccia a lo pietto a lo momento.
E lo cuollo a li rine era azzeccato
Tanto ch'arreto jevano a la via,
Ca ognuno a bedè nnanze era cecato.
Fuorze pe fforza già de parlasìa
S'avotaje accossì quarcuno ntutto,
Ma non lo bedette io, nè credo sia.
Sì Dio te lassa a tte pigliare frutto
De chesta lezione penza e appura
Comm'io potea tenerme l'uocchio asciutto,
Quanno vedette storta la natura,
Che si chiagneva uno de chilli tale
Se 'nfonneva lle ppacche adderittura;
È certo ch'io chiagneva pe gran male,
Appojato a lo scuoglio, e llà lo Masto
Disse: Si pure ciuccio tale e quale?
Quann'è morta piatà ccà nce àve pasto,
Chi è cchiù scellarato de chi mette
A lo judicio passione e fasto.
La capo aiza, e bbì comm'arapette
Tebbe no juorno chella soja gran terra
Ch'Anfiarao e lo carro s'agliottette,
Quanno pe Policine fice guerra;
E non s'arrovinaje pe chesta valle
Nfino a Menuosso che subbeto afferra.
Guarda ch'à fatto pietto de le spalle;
Volenno vedè troppo pe da nante
Non vede che 'ncontrario p'ogne calle.
Teresia vedette mmiezo a tante
Quanno femmena lesto addeventaje,
Cagnannose li miembre tutte quante;
Chisto era n'annevino che toccaje
Co la mazza duje sierpe 'ntorcigliate,
Primma che d'esse mascolo lassaje.
Aronta attuorno a isso dà vracciate
Che dinto Lunigiana steva quanno
A Carrara le tterre avea sorcate,
Nfra janche marme avette casa tanno
Da non potè vedè manco le stelle
Nè lo mare, nè niente, comme aguanno.
E chella che commoglia le zzezzelle
Che tu non bide, e à sciòvete le ttrezze,
E tene attuorno ogne pelosa pelle,
Manto fuje che cercaje pe tterre a ppiezze,
E nce mettette llà addò io nascette,
Onne sienteme mo co st'arrepiezze.
Quanno lo patre sujo tanno morette,
Serva facenno la cetà de Baco,
Chesta gran tiempo pe lo munno jette.
Ncopp'a la bella Italia sta no laco,
Mponta a l'Arpe che nzerra la Lamagna,
Ncoppa Tiralli, e à nomme Benaco.
E pe ffontane a mmille llà s'abbagna
Nfra Garda e la Camoneca e Appennino,
De l'acqua ch'a lo laco stisso stagna.
E mmiezo llà addò stace lo Trentino
Vescovo, e chillo e Brescia e Veronese,
Benedicere ponno llà vicino.
Nce sta Peschiera ch'è no gran paese,
Ca co Bergamo e Brescia pò sta a fronte,
E la riva p'attuorno cchiù nce scese.
Ccà commene che cade da lo monte
Chello che co Benaco sta non pò,
E se fa sciummo e passa ccà lo ponte.
Appena l'acqua scorrere ccà vò,
Minoio se chiamma addò nc'è sta passata
Nfino a Governo addò scenne lo Pò!
Non corre assaje che trova na vallata
A la quale se stenne e se 'mpaluda,
E a la state sol'essere appestata.
Da ccà passanno Manto, chella cruda
Terra vedette mmiezo a lo pantano,
Che è ciuccia e d'abbitante stà a l'annuda.
Llà pe scappare ogne trascurzo umano
Facette le ffatture notte e ghiuorno,
E llà lassaje lo cuorpo tanto vano.
L'uommene pò ch'erano sparze attuorno,
Jettero a chillo luoco tanto forte
Pe lo pantano ch'era no taluorno.
Izajèno la cetà ncopp'ossa morte,
E pe chella Mmalora de li cane,
Mantova la chiammajeno senz'autra sciorte.
Nascettero assaje ggente Mantovane
Primma che Casalode pe pazzìa
Da Pinamonte avesse nganne strane;
Mperò te dico, ca si siente 'mbìa
Parlà de chesta terra d'autro muodo,
Tu cride a primmo sbuordo ch'è boscìa.
E io: Sio Masto, lo parlà tujo sodo
È certo che mme sta capacitanno,
Ch'ogn'autro mutto mme jarria a smuodo.
Ma dimme si nfra chille nnanze vanno
Si ne vide uno digno mo de nota,
Che sempe a chesto io mo stongo penzanno.
Tanno me disse: Chillo che s'avota
Co longa varva nfì a la spalla bruna
Fuje, quanno la Grecia pe na vota
N'avette uommene e nce guardaje la luna,
Agurio dette punto co Carcanta
Ad Auride pe ttaglià la funa.
Aurìpelo è chiammato, e accossì canta
Chesta traggeddia mia già pe ogne luoco;
E lo ssaje tu chè la saje tutta quanta.
Chill'autro che de carne tene poco,
Michele Scuotto fuje, che overamente
De fauza magìa fice lo juoco.
Vide Guido Bonatte e vide Astente
Che mo vorria sentire a lo scarparo,
Ma nobbele isso fuje, tarde se sente.
Vide chelle che l'aco e lo telaro
Lassajeno già pe ffarese annevine;
Le ffatture facenno 'mparo 'mparo.
Ma vienetenne, che stammo a la fine
Nfra cielo e terra, e già se tocca l'onna
Sotto Sebilia, Caino, e le spine;
E ajiere a nnotte fuje la luna tonna:
E t'àje d'allicordà che te schiaraje
Jenno pe dinto a vuosco fronna fronna:
Zzò dicenno da llà m'allontanaje.