Paggena:La Divina Commedia Napoletano Domenico Jaccarino-Nfierno.djvu/88

'A Wikisource.
Chesta paggena è stata leggiuta du' vote e mo è fernuta.
— 90 —

Io credo ch'a lo Masto mio piacesse,
Aspettaje sempe co contenta faccia,
Che de li mutte suono se sentesse.
E mme pigliaje co tutte doje lle braccia,
E strignennome mpietto zitto zitto,
Se nne tornaje arreto a votafaccia.
Nè se stancaje de mme tenere stritto
Portannome da ncoppa a l'arco allora
Che nfra de li duje circole è traggitto.
Ccà mme posaje leggiero fora fora
Pe non farme ntoppà nfaccia a lo scuoglio,
Che a le ccrape farria male llà ancora,
E n'autra vallata llà scommoglio.


CANTO VENTESEMO
ARGOMIENTO
Lo Poeta ccà parla de la pena de chille che volevano annevinà lo ffoturo; la quale pena conziste a tenè la faccia e lo cuollo avotate da la parte de li rine; e de chesta manera, pecchè non ponno cchiù vedè da nanze, camminano da dereto. Nfra de chiste trova Manto Tebana de la quale sente avè avuto origgene la cetà de Mantova. E isso e tutte l'autre annevine so puoste dinto a la quarta borgia.


Ancora vierze aggio da fa pennate
Pe scrivere potè chist'autro canto
Primma canzona d'aneme dannate.
Io steva già dispuosto tutto quanto
A guardà a lo scopierto chillo funno
Che se 'nfonneva de spremmuto chianto!
Vedette gente a lo vallone tunno
Venì zitto chiagnenno a passo lento,
Che fanno letante a chisto munno.
Comme io steva cchiù abbascio e steva attiento
Mme pareva ch'ognuno era 'mbrogliato
Da la faccia a lo pietto a lo momento.