Divina Commedia (Napulitano)/19
O Simon Mago, e vuje che ghiate appriesso,
Che le ccose de Dio, che de bontate
Anno a esse le spose, e buje pecchesso
P'oro e argiento addavero avviziate;
Commene ca pe buje sona la tromma,
Pecchè a la terza borgia mo già state.
A sto sepurcro già lo Masto assomma
E io pure a lo scuoglio 'nchella parte
Che ghiusto ncoppa a mmiezo fuosso 'nghiomma.
Oh grannezza de Dio, e quant'è ll'arte
Che ammuste e 'n Cielo e nterra e a mmalo munno,
E quanno justa la vertù scomparte!
Vedette io pe le ccoste e pe lo funno
Chiena la preta de pertosa scure,
Ognuno eguale e ognuno tunno tunno.
Non erano cchiù gruosse o cchiù sicure
De chille che so fatte a san Giovanne
Justo pe lluoco de battizzature.
L'uno de chiste, e non songo assaje anne
Rompette, ca uno dinto s'anniava:
Lo suggillo sia chisto contro a 'nganne.
Fora a la vocca a ognuno sopirchiava
Piede e ggamme d'affritto peccatore,
Mmentre lo riesto dinto se restava.
Li piede appicciate erano co ardore
E tanto che llà jevano zumpanno
Ch'avriano rotte funne pe dolore.
Comme cose sedonte arze te fanno
Na sciamma forte assaje e rrossa rossa,
Accussì chilli piede a ffare stanno.
Chi è chillo Masto, che 'ndolore à mossa
Zompanno cchiù de ll'autre, che sso muorte,
Dicette io, e àve sciamma assaje cchiù grossa?
E isso a mme: si vuoje che llà te puorte
Abbascio a chella ripa che llà stace,
Da isso saparraje tutte li tuorte.
E io: Tutto faccio io si a tte piace;
Da chello che la capo toja ccà face.
Jettemo allora a lo girone quarto,
Votammo e ppò scennimmo a lo mmancino
Pe lo funno già rutto a quarto a quarto.
Lo Masto mme tenea sempe vicino
Nfì che ghiammo a lo rrutto 'nchillo luoco
De chi chiagneva llà comm'a zampino.
O tu che sotto e 'ncoppa staje a sto ffuoco,
Anema trista, comm'a tirave fessa
Io dicette, si puoje, parla no poco.
No monaco io pareva che confessa
No nfamone assassino che sta fitto
E isso chiamma, ca la morta cessa.
Chillo strellaje: Si tu già mo deritto
Si tu già mo deritto, Bonefazio?
De paricchie anne me ngannaje lo scritto.
Si priesto tu de chelle si già sazio,
Pe le quale faciste chillo nganno
A na bella fegliola a farne strazio?
Mme facette io comm'a chille che stanno
Pe non avè risposta pe lo riesto,
Quase scornate, e cchiù parlà non sanno.
Vergilio pò dicette: Dille priesto:
Io non songo chi cride, risponnette,
E risponnette comme mme fuje 'mpuosto.
Lo spireto li piede llà smovette,
Pò sospiranno e co voce de chianto
Donca da me che cirche? mme dicette.
Si de sapè chi so te 'mporta tanto,
Che nfì a ccà si venuto 'ncannavola,
Sacce ch'io fuje vestuto co gran manto:
Papa Orsino fuje io Terzo Nicola,
E de me fece nnanze lli pariente
Mm'arrecchette la vorza, e mo ccà scola.
Da sotto a mme ccà l'autre vanno a stiente.
Che de me primma stettero 'ncomanno,
E stise nterra stanno sti fetiente,
Llà abbascio cadarraggio io pure, quanno
Vennarrà chi credeva che tu fusse
Quanno io te fece subbeto addimmanno.
Ma è chiù tiempo li piede aggio a li musse,
E ch'io ccà sotto e ncoppa songo stato,
Ch'isso non starrà miso a piede russe;
Venarrà dopo d'isso, brevognato
Da Ponente no Papa senza legge,
E io a isso aggio a ffà sta commigliato.
No Jasono sarrà, comme se legge
De Maccabbeje, si fuje lo Rre pupazzo,
Accossì sarrà mo chi Francia regge.
Io non saccio si fuje ccà troppo pazzo
Ch'io risponnette a isso a chisto fieto:
Dimme quanta trisore o che palazzo
Cristo volette primma da San Pieto
Che lle desse le cchiave pe portiento?
Non dicette autro che: Vieneme arreto.
Pieto co ll'autre non bolette argiento
Nè cercaje oro a San Mattia llà ascenno,
Quanno perdette l'anema qua viento.
Mperò te sta sta pena a quanto ntenno,
Guarda l'arruobbo fatto co sconquasse,
Che contra Carlo te fice ì redenno.
E si non fosse che mme contrastasse
De cheste cchiave ccà la riverenzia,
Che tu teniste pe la vita a spasse,
Io parlarria co cchiù confidenzia;
Ca l'avarizia vosta tutte attrista,
A li buone portanno na scajenzia.
De nuje se n'addonaje lo Vangelista,
Quanno la Cchiesia ch'era strapotente
Fuje co li Regge puttaniare vista;
Chella, che avette sette Sacramente,
Co li Comannamiente che sapite,
Nfì che li Pape fujeno bona gente,
D'oro e d'argiento Dio fatto v'avite;
Ch'autro è pe buje chi a Dio sempe stonaje?
Chillo uno addora, e a cciento vuje servite!
Costantino nce à corpa che donaje
A San Serviesto Romma temporale
E tanno nce volette into a li guaje!
Mentre io chesto diceva tale e quale,
O che coscienzia o arraggia lo pognesse,
Tirava nterra cauce a farse male.
Io credo ch'a lo Masto mio piacesse,
Aspettaje sempe co contenta faccia,
Che de li mutte suono se sentesse.
E mme pigliaje co tutte doje lle braccia,
E strignennome mpietto zitto zitto,
Se nne tornaje arreto a votafaccia.
Nè se stancaje de mme tenere stritto
Portannome da ncoppa a l'arco allora
Che nfra de li duje circole è traggitto.
Ccà mme posaje leggiero fora fora
Pe non farme ntoppà nfaccia a lo scuoglio,
Che a le ccrape farria male llà ancora,
E n'autra vallata llà scommoglio.
Ancora vierze aggio da fa pennate
Pe scrivere potè chist'autro canto
Primma canzona d'aneme dannate.
Io steva già dispuosto tutto quanto
A guardà a lo scopierto chillo funno
Che se 'nfonneva de spremmuto chianto!
Vedette gente a lo vallone tunno
Venì zitto chiagnenno a passo lento,
Che fanno letante a chisto munno.
Comme io steva cchiù abbascio e steva attiento
Mme pareva ch'ognuno era 'mbrogliato
Da la faccia a lo pietto a lo momento.