Divina Commedia (Napulitano)/16
Già steva addò senteva justo tanno
L'acqua a lo chirchio ottavo addò cadeva,
Comme ll'ape lo mmele a ffare stanno.
Tre ombre nzieme ognuna se metteva
Correnno da na torma che passava
Sotto a ll'acqua a martirio che chioveva.
Da nuje venenno ognuna nce strellava:
Scostate tu che a lo vestito pare
De la terra che nuje porzì figliava.
Che cchiaje vedette nfaccia a sti compare
Antiche e nove e chiù appicciate 'nfuoco,
Ca mme fa male si nce sto a penzare.
Se fermaje lo Masto pe no poco,
E a mme votato po' dicette: aspetta,
Cortese avimmo a essere a sto luoco;
Si non fosse lo ffuoco che saetta
De sto luoco natura, io diciarria
Che cchiù de pressa avrisse a ghì sta stretta.
Da capo accommenciajeno 'nchella via
A ddì lo stesso, e a nuje lesto arrivate
Na rota tutte e tre ficero, e bìa.
Comme a li campiune che spogliate
Facevano a lo campo n'ammenaccia
Primma de se pigliare llà a mazzate;
Votavano accossì tutte la faccia
Da parte mia, ma de na manera
Che lo cuollo a li piede già s'affaccia.
Si la miseria ccà fa brutta cera
Le ppregarìe nostre disprezzaje,
Uno dicette che abbrusciato nn'era.
Nuje te pregammo nfra de tanta guaje
De dirce tu chi si, che chisti piede
Da lo nfierno non staje a llevà maje.
E isso: ste ppedate, e ognuno vede,
Simbè vaco a l'annuda e cchiù spelato
De grado gruosso fujeno e non se crede.
Guidoguerra fuje chisto sbentorato
Che quanno era a lo munno vivo allora
Era guappo de spada assaje provato.
L'autro ch'è appriesso a chell'arena fora
È Tegghiajo Autobrante, che la voce
S'avria a lo munno da sentire ancora.
E io che puosto so co lloro 'ncroce,
Jacopo Rusticuccio fuje, e certo
La 'nfama sposa mia me ngotta e coce.
Si da lo ffuoco io fosse ccà copierto
Nfeccato mme sarria da lloro 'nsotto
Lo Dottore l'avria, credo, sofferto;
Ma pecchè me sarria abbrusciato e cuotto,
La paura vincette chesta voglia,
Ch'abbraccià li boleva ciuotto ciuotto.
Disse: despietto cchiù non è, ma doglia,
E chisto stato vuosto m'affriggette,
Tanto ca mo da me tarde se spoglia;
Appena sto signore mme dicette
Parole, pe le qquale io me penzaje
Che comm'a buje so l'autre a chisto sette;
So paisano vuosto, e sempe maje
e vuje lo ffare e li nomme annorate
Io volette sentire, e mme mparaje.
Lasso lo ffele, e cose nzuccarate
Vaco cercanno, e songo apprommettute,
Ma abbesogna che scenno addò vuje state.
Si ll'arma toja ste ccarne 'ncespecute
Portarrà a lluongo, disse chillo tanno,
E si la grolia toja n'avrà salute;
Cortesie e bravura dì, si stanno
A lo paese nuosto, comme sole,
O songhe jute fora ntutto aguanno?
Nc'è Gugliermo Borziere ca se dole
Co nuje pe ppoco, e và co li compagne,
Ássaje nce affenne co le ssoje parole.
La gente nova e li fatte guadagne
Superbia senza fine ànno criata
Fiorenza a tte, che già mo tu ne chiagne.
Ccossì strellaje co la faccia aizata,
Li treje chesto sentenno pe risposta
Se ficero de pressa na guardata.
Si ll'autre bbote poco ccà te costa
Risposero, pe l'autre contentare
Viato a tte che parle a bella posta.
Mperò si da sti luoche staje a scappare
E tuorne po' a guardà le bbelle stelle,
Quanno a dicere: io fuje, te pò giovare;
De nuje parla a li ggente poverelle,
Rompettero la rota, ed a ffuire
Stettero comme avessero le scelle.
N'ammen non s'avria potuto dire
Priesto accossì comme fujeno sparute,
Ch'a lo Masto parette de partire.
Io jeva appriesso, e poco èramo jute
Ca d'acqua lo rummore era vicino,
Tanto ca nuje non èramo sentute.
Comm'a sciummo ch'à proprio lo cammino
Primma da monte Veso a lo Levante
Da la mancina costa d'Appennino,
Ca se chiamma Acquacheta ncoppa e nnante
Che scenne sempe abbascio into a lo lietto,
E a Forlì de sto nomme isso è vacante.
Rembomma ncoppa llà San Benedetto
Dall'Arpe pe ccadè ncopp'a na scesa
Addò pe mmille nce avria a sta arricietto;
Accossì pe na ripa tutta appesa
Facca chell'acqua tenta na cascata
Si, ca mpoch'ore avria la recchia affesa.
Na funa attuorno teneva io attaccata
De pigliare a penzare co essa stette
La fera co la pelle già pittata.
E quanno io llà da me chella sciogliette,
Comme lo Duca aveva commannato,
A mmatassa mbrogliata io nce la dette.
Se votaje isso a lo deritto lato,
E lontano no poco da la sponna,
Abbascio la menaje de lo burrato.
Novità mo commene che risponna
Nfra me diceva a chilli movimiente,
Ca co ll'uocchie lo Masto s'asseconna.
Ah, comme ll'uommene ànno a esse attiente
Appriesso a chille che non già a guardare
Ma capesceno tutto qua sacciente.
Dicette a mme: llà vedarraje arrivare
Chello ch'aspetto, e che tu suonne 'mbìa,
Nnanze a tte io farraggio scommigliare.
Sempe a lo vero che pare boscìa
L'ommo à da parlà poco e chiaro e puro
O nn'è creduto ca pe na pazzia,
Ma ccà non pozzo starme zitto, e ghiuro
Pe chisti vierze, a chi me sta ascotanno
Si de la grazia soja non so sicuro,
Ch'io pe chell'aria vedde venì tanno
Na fiura da ncoppa, e io me nce pascio,
Maravigliosa a chi la va guardanno,
Conforme torna chillo che va abbascio
A llevà ll'àncora a mmare e lesto scappa
Si de scuoglie àve attuorno no gran fascio,
Pò vene a galla e nfaccia nce s'acchiappa.