Divina Commedia (Napulitano)/12

'A Wikisource.

[p. 57 càgna]

CANTO DUDICESEMO
ARGOMIENTO
Arrivate li Poete a no luoco arroinato, trovano ch'era guardato a vista da no Minotauro. Scenneno abbascio a lo settemo piano scompartuto a tre ggire, e accostatese a lo funno trovano li Cientaure. Vergileo tanto che ffà, è portato tanto isso che Dante da uno de chiste Cientaure a ccoscia-cavallo jenno vedenno tutto lo primmo giro pe ncopp'a na striscia de sango, addò strellavano forte assaje li violiente contro a la vita e a lo bene de lo prossemo.


Era lo luoco, addò jettemo, brutto
Tanto, che a chella vista e a chillo stato,
Ncanna te s'appilava lo connutto.
E comme che lo scianco arroinato
Trento lo sciummo Adece facette
Pe tterramoto, o caso chiù spiatato,
Che da lo monte da dò se movette
A lo chiano nce sta na rocca appesa,
Ca ncoppa uno non àve addò se mette.

[p. 58 càgna]

De chillo luoco chesta era la scesa,
Ed a la ponta llà de chella ntacca
La nfamità de Creta steva stesa
Che conceputa fuje da finta vacca,
Quanno vedette a nuje cchiù s'arraggiaje,
Comm'a chi non te pò tenè a la sacca.
Lo Masto mio allora allebrecaje:
Lo Duca, cride che sta ccà, d'Atene
Che t'accedette, e pò se vennecaje?
Vattenne, brutta bestia, ca non vene
Ammaistrato da la sora toja,
Ma va vedenno tutte cheste ppene.
E comm'a ttoro che se stizza e ngroja,
Quann'à avuta na botta assaje mortale,
Corre ccà e llà, ca nn'à la strata soja,
Fice lo Minotauro tal'e quale,
E chillo disse: Attiento a sta pazzia,
Mmentre sta 'nfuria è buono che t'acale.
Pigliajemo accossì pe l'autra via
Ncopp'a le pprete, che no terramoto
Facevano da sotto, (arrassosia!..)
Io pensava, e lo Masto: a chisto moto
Tu pienze, e a st'arroina ch'è guardata
Da ll'ira ch'aggio accisa, e già me voto.
E sacce mo ch'a la vota passata
Ch'io ccà venette tutto pe guardare,
Sta roccia ccà non era annabbessata,
Ma certo, poco primma, a quanto pare,
Che venesse chi lesto lo gran butto
De lo chirchio de Dite fuje a levare,
Da tutte parte chesta valla, e tutto
Tanto tremmaje, che mme parea lo munno
Sentesse ammore o fauzo o frabutto.
E ghiesse lo Caosse a lo sprofunno;
E allora sta montagna into a no niente
A l'autre parte e ccà jette a zzeffunno.

[p. 59 càgna]

Ma nficca ll'uocchie appriesso, e la vollente
Caudara de sango guarda, e vide
De lo prossemo nuosto li violente.
Guarda l'ira che ffà, va te nne fide,
Ca si la vita toja tutto te 'mpatta,
Doppo la mala morte pò nce cride.
E na fossa io vedette ad arco fatta
Che llà tutto lo chiano attuorno abbraccia
Commo lo Masto aveva ditto esatta.
E ntra la riva e eessa a mme de faccia
Co le ssaette li Cientaure armate
Correvano si jessero a la caccia.
Vedenno a nuje, se stettero fermate,
Tre sulamente senza fa prijezza
Vedettemo co ll'arche allontanate.
Uno strellaje: a che 'nchesta bruttezza
De luoche vuje scennite, e a chesta costa?
Dicitelo, si no tiro la frezza.
Lo Masto mio dicette: La risposta
A Chirone la dammo a ttico appriesso,
Tu vaje sempe de pressa, a tutta posta.
Pò m'ammostaje, dicenno: Chillo è Nesso
Che morette, gnorsì, pe Dejanira,
E la vennetta la fice isso stesso.
E chillo mmiezo, che mpietto s'ammira,
È lo Chirone che crescette Achille;
Chill'autro è Folo, chino chino d'ira.
Ntuorno a lo fuosso vanno a mmille a mmille
Saittanno chell'aneme che stanno
Aizà la capo, o sulo li capille.
Vicino a chelle ffere jammo tanno:
Chirone llà co ll'arco e co la cocca
La varva da la vocca va scostanno.
Quanno se scommigliaje chella gran vocca,
Dicette a li compagne: state accuorte
Che chillo arreto move zzò che tocca!

[p. 60 càgna]

Accossì ccà li piede de li muorte
Non fanno; e lo sio Masto a sto dovere
Nnanze lle va pe dare li confuorte.
Dicenno: È bivo, e a quanto pò parere
Me commene ammostà la valle scura,
Necessità nce porta, e nò piacere.
L'Alleluja fenette a sta paura,
Che no vivo a no muorto accompagnaje,
Non è latro, nè io anema 'mpura.
Ma pe chella vertù che me 'ncappaje,
Pe ccammenà pe chesta strata rossa,
Dance na guida toja de cheste ch'àje
Che nce faccia abbedè tutta la fossa,
Portanno a chisto ncuollo che non bola,
Ca spireto non è, ma è carne e ossa.
Chirone se votaje na vota sola
Dicenno a Nesso: Va co sti sapute,
Scànzale tu da li Cientaure a stola.
Co sta guida nuje jammo, e già venute
Simmo nfaccia a la riva, addò sentimmo
Strellare forte assaje chilli vollute.
Nfì a ll'uocchie gente a bòllere vedimmo,
E lo Cientauro dice: So ttiranne
Che suocce dinto a lo nfierno non avimmo.
Se chiagneno accossì tutte li danne,
Nce sta Alisantro e Dionisio 'ngiro,
Che a Cecilia scortaje la vita e ll'anne.
E chella fronte co lo pilo niro
È Azzolino, e chill'autro ch'è ghiunno,
È Obizzo d'Este che comm'a no piro
Cadette acciso ncoppa de lo munno.
Allora lo Poeta me dicette:
Chisto te sarrà primmo ed io secunno.
Chiù nnanze lo Cientauro se mettette
A guardà gente che nfì a ncanna stesa
Dinto a lo sango a bollere se stette.

[p. 61 càgna]

E n'ombra sola nce ammostaje llà appesa
Dicenno: Chillo è Arrico, che atterrato
A cappella riale fuje de Chiesa.
Pò vèddemo chi steva scommigliato
Nfino a lo pietto, fatto comm'a n'uosso,
Canoscenno cchiù d'uno nchillo stato.
Accossì se facea sempe cchiù nfuosso,
Lo sango, che li piede a commigliare,
Steva sulo, e passajemo ccà lo fuosso.
Comme tu da sta parta può guardare
La sango che va sempe chiù ammancanno,
Dicette lo Cientauro, à da restare.
Da st'autra parte a ppoco a ppoco, quanno
Arrivato a lo funno se cognogne,
La tirannia da ccà va zeffonnanno.
La jostizia de Dio da ccà mo pogne
Chill'Attela che fuje fragello 'nterra,
E Pirro e Sesto, e aternamente mogne
Le llacreme, che co lo vullo afferra
A Rinier da Corneto e a l'autro Pazzo
Che ficero a le strate tanta guerra.
Pò s'avotaje, e se passaje lo guazzo.