Divina Commedia (Napulitano)/10
CANTO DECEMO
ARGOMIENTO
Pe na schianata stretta cammenava,
Nfra lo muro e lle ffosse de li muorte
Lo Masto mio, e io l'appedecava.
O tu, Vergilio mio, che ccà mme puorte
Comme piace a tte pe sti tormiente
Dimme quaccosa ncoppa de sti puorte.
E chella che sta ccà nzerrata gente
Se pote mo vedè, che so levate
Li copierchie e no nc'è chi tene mente?
E isso a mme: saranno ccà nzerrate,
Quanno da Giosafatta tornarranno
Co li cuorpe che llà nce ànno lassate.
Lle ffosse lloro da sta parte stanno
E ssicuro co l'autre a li sprofunne,
Che l'arma co lo cuorpo morta fanno.
A ll'addimmanna toja, pe chisti tunne
Che tu me faje, darraggio na resposta,
E a lo golio tujo, che m'annascunne!
E io: Masto, non tengo mo annascosta
A tte la voglia mia manco pe poco,
Ca pe li mutte tuoje mo non se sposta.
O Tosco, che pe la Cetà de fuoco
Parlanno aonesto te nne vaje ccà vivo,
Rèstate co piacere 'n chisto luoco.
Io già a vedere finarmente arrivo
A qua paese l'arma toja nascette,
Lo quale fuorze fice io fa corrivo.
Subbeto subbeto chisto suono ascette
Da uno de chill'arche, e io m'accostaje
Pe paura a lo Masto che strignette.
E isso a me: Votate ccà, che faje?
Vide llà Farenata ritto ritto,
Da lo cuorpo a la capo lo vedraje.
Io che già lo guardava fitto fitto
Smaniava d'arraggia tutto 'nfiesto
Pe despietto a lo 'nfierno lo mmarditto.
E co lle mmane soje lo Masto priesto
A isso mme vottaje pe no conziglio,
Dicenno: Parla chiaro e dì lo riesto.
Jette a la fossa io lla comme a cconiglio,
Mme guardaje no poco, e co lo ffelo
Mmocca m'addimmannaje: a chi si figlio?
E io che a ffare tutto aveva zelo,
Ntutto obbedette a li conziglie suje,
Onne isso pò guardaje no poco 'ncielo.
Disse: so figlio a chi contrario fuje
A mme e a la parta mia e a l'antenate,
Tanto che nce spartettemo pò nuje.
Tornajeno ccà, si fujeno cacciate
E l'una e l'autra vota, io risponnette,
Ma chell'arte mperò n'ànno mparate.
Allora a chella vista se sosette
Un'ombra longa dinto a no lenzulo
Che addenocchiata, io credo, se mettette.
Me guardaje pe vedè si steva io sulo
Attuorno attuorno avennome squatrato,
E quanno me votaje doppo lo culo,
Disse chiagnenno: si po sto cecato
Carcere vaje, dimme lo figlio mio
Addo sta, pecchè ccà non l'àje portato?
Da me stesso non vengo, dicette io,
Chillo che ccà mme porta e pò se scosta
Guido, lo figlio vuosto, avette a rio.
Le pparole e la pena 'nchella posta
D'isso m'aveano già ditto lo nomme,
Mperò fuje conchiudente la risposta.
De subbeto allungato, strellaje: Comme
Diciste avette, e che! non campa ancora?
Non vede luce cchiù nfra le ppalomme?
Non sentenno da me risposta allora
Doppo che pe no poco isso aspettaje,
Cadette a la supina, a n'ascì fora.
Ma chill'autro granne addò fermaje
Io llà miezo, restaje tale e quale,
Nè se movette affatto, nè chijaje.
E si chell'arta ànno mparata male
Continuanno me dicette a parte,
Chiù me trommenta, che sto lietto tale.
Appicciata cinquanta vote 'mparte
La faccia non sarrà de chi ccà regge,
Che, quanto pesa, tu sapraje chell'arte.
E si lo munno doce a te protegge,
Dimme, a che chillo popolo è birbante,
Che de li mieje va contro ogne legge?
E io lo fatto, dicette straziante
Che l'Arbia allora rossa essa facette,
Sta prejera fa fare a nuje ccà nnante.
E movenno la capo isso dicette
Sulo non fuje a chesto, e certamente
Co l'autre, senza fine, io me movette.
Ma io llà fuje, addove pe ntramente
Se voleva levare da Sciorenza
Chi l'aveva defesa apiertmente.
Io lo pregaje: de vuje non faccio senza,
Sciogliteme lo nudeco che à fatto
Mbrogliare assaje mo chesta mia sentenza.
Me pare che sentite nnitto nfatto
De lo ffoturo le llontane vuce
E a lo presente avite n'autro tatto.
Vedimmo, comme a chi à la mala luce,
Dicette: chelle ccose da lontano,
Tanto ne sbrenne a nuje lo granne Duce.
Lo cereviello nuosto è ntutto vano
Si autre cheste ccose nò nce apporta,
Non sapimmo lo stato vuosto umano.
Ntennere puoje mperò che tutta morta
Sarrà la canoscenzia nosta allora,
Ca lo ffoturo nchiusa avrà la porta.
Pentuto, dicette io tanno: mmalora!
Dicite a Cavalcante ch'è caduto:
Lo nato sujo è co li vive ancora.
E se io a la risposta fuje già muto
Facitece sapere ch'io penzava
Gia a l'arrore ch'avite a mme scomputo
E già lo Masto mio llà me chiammava,
Ma io pregaje no spireto nfra chille
Me dicesse co chi s'accompagnava.
Dicette: io stongo ccà co cchiù de mille
Ccà dinto è lo secunno Feterico
Lo Cardinale e chiù non faccio strille.
Sannasconnette doppo, io da l'antico
Poeta me ne jette, repenzanno
A lo parlà, che me parea nemmico.
E isso se movette, e cammenanno
Me dicette: pecchè staje 'nzallanuto?
E io l'obbedette nchillo sujo comanno.
Tiene a mmente mo chello ch'àje sentuto
Contra de te, me commannaje lo saggio,
Aspetta ccà, e lo dito aizaje speruto.
Quanno nnanze sarraje a lo doce raggio
De chella che co l'uocchie tutto vedek,
De la vita te dirrà lo viaggio.
A la senistra po' votaje lo pede:
Lassajemo chelle mmura, e mmiezo a stiente
Jettemo pe na valle catapede,
Che puzzava, e nfì a ncoppa era fetente.