Canzone e Ariette nove/Ariette nove/Ll' ato juorno
Modello:QualitàModello:IncludiIntestazione
Ll’ato juorno…
Ll’ato juorno, scennenno p’’a strata
ca se parte d’’ o Vommero antico,
quanno fuie mmiez’ ’o llario ’a Nfrascata
Nunziatina vedette passà.
«Primmavera!… — penzaie — Sì.. tu sola,
cu st’arietta ca scioscia ’a matina,
tu, tu sola puo’ fa Nunziatina
a stu core c’aspetta turnà…
St’aria, st’aria addurosa e suttile,
nun è ’a stessa pricisa ’e ll’ato anno,
quanno, proprio priciso int’Abbrile,
p’’a Nfrascata scennette cu me?…»
. . . . . . . . . . . . . . . .
Mme fermaie. M’avutaie chiano chiano,
e vedette ca s’era avutata:
mme faceva nu segno e’ ’a mano,
mme diceva cu ll’uocchie: Bonnì!…
E cu ’e sciure d’ ’o tiempo e cu ’e vvoce,
Primmavera, ’a vì ccanno, è trasuta!…
Songo asciute ’e llimóne acradoce,
e mo stanno ’e ccerase p’ascì…
This page was moved from. It's edit history can be viewed at Canzone e Ariette nove/Ariette nove/Ll' ato juorno/edithistory