Paggena:Viaggio di Parnaso 1666.djvu/52

'A Wikisource.
Chesta paggena è stata leggiuta du' vote e mo è fernuta.
52
CANTO

Perzò me fece priesto cravaccare,
Dicenno curre, e porta sta preiezza
A lo Parnaso, e Febo và à pregare,
Che se ne faccia festa, ed’allegrezza,
Pè mille cause tu lo dive fare,
E perche t’è pregato da sua Autezza,
E perche ogn’hommo nterra piglie core
De ire nnante, e de se fare nore.
Perche nò, disse Apollo? io già le fice
Da quanno era figliulo la patente,
Che co lo stile suo bello, e felice
Ire potesse a lo Petrarca rente
E c’havesse li Ciele tant’ammice,
Che n’haggia da morire maie pè niente
Ntanto rengratio mò soa Segnoria,
Pocca è menistro de la voglia mia.
Io voglio, che Parnaso, ed’Alecona,
E tutte sti Poete, ed’ogne Musa,
Nce facciano na festa assaie cchiù bona,
Che tra lo Giugno a Napole s’ausa,
Ncè sia commeddia, e ballo de ciaccona,
Che la Mmidia ne reste assaie confusa,
E dureno no mese li remmure
De li gran tricche tracche, e scoppature.
E perche sia la festa cchiù de sisco,
Viseta voglio fare generale,
E conca mò pe forza stà à lo frisco,
Voglio ch’esca, e che faccia carnevale,
E strille forte quanto vò lo Fisco,
Ca cò tutte sarraggio liberale,
Pocca puro a lo Munno vego schiuso,
Chi face bene a n’hommo vertoluso.

Ditto