Paggena:Viaggio di Parnaso 1666.djvu/49

49

QUARTO.

Partuto ch’isso fù, subbeto auzaro
Li mesale, e benettero le carte,
E Febo cò le Muse accommenzato
No iuoco, che perzì s’usa a ste parte,
Reverzino se chiamma, io appe a caro
A la vecchiezza de mparare st’arte,
O bello iuoco, iuoco de Coccagna,
Che chỉ manco ne fà chillo guadagna!
Guadagnaie Febo, ed io pe paraguanto
N’appe no tredecinco nuovo nuovo,
Ma ogne Musa capezzeia tratanto,
Che de suonno già stea chiena còm’uovo
S’auzaro addonca, e l’una à l’autra accanto
Mpizzare à l’uocchie se sentea no chiuovo,
Febo perzì storduto se stennecchia
Mmiezo a la sala a na coperta vacchia.
Io scengo a lo cortiglio, e m’addormento
Cò gran gusto appoiato a no cantone,
E beo dormenno cò no gran contento
(Non saccio se fù suonno, ò vesione)
Na femmena cchiù lustra de l’argiento,
Che portava l’ascelle, e no Trommone,
Dicenno, chi fù maie da Battro à Thile
Famuso cchiù del Cavalier Basile?
Da chisso hà schiacco matto ogne Scrittore
O sia Toscano, ò Grieco, ò sia Latino,
Chisto hà no stile, che l’hà fatto nore,
Quanto lo Sole fà luongo cammino,
Isso te fa la via cò lo valore
A la Grolia, e ne schiatte lo destino,
Ca mò è d’Apollo commo frate caro,
E le vò bene de le Muse à paro.

Viaggio di Parnaso,

Dire

C