Concetta
Ah? Che te credive?.. So’ ddoie settimane ’e pane... (Rumori, battimani, risate dalla casa di rimpetto. Concetta si volta alla finestra, e tentenna il capo e fa atto con le mani alla finestra) Spassateve! Spassateve!... Ah! Essì! Piccio fora e farina dinto!... (accosta una seggiola al tavolo e vi siede accanto, in silenzio. Dopo un momento) Sto penzanno a donn’Erminia... (tentenna il capo, sorridendo ironicamente) Ll’è cummenuto, pe na lira, nu cuollo ’e merletto ’e dantèlle! I’ comme se sanno apprufittà!...
Silvia
Va buono, mammà, nun fa niente...
Concetta
Tu dice sempe nun fa niente?
Silvia
Ma c’aggia di’?
Concetta
E pe dduie mise ’e lezione ch’ ’e’ dato ’a figlia, a Ninì t’ha dato niente sta signora princepessa?
Silvia
(triste e seccata)
Uh... mammà!...
