Michele
Ll’appello mme scennette a trirece mise? E io nn’aggio fatto diece! Chesto saccio.
Assunta
Ma pecché?
Michele
Pecché?... Eh!... Pecché, mprimmese, aggio fatto bbona cundotta... E po’, don Federico Funelle mm’ha fatto comme a nu frate!... (Va alla tavola. Vi siede. Si alza daccapo) ’O bbello sa ched’è? Manco isso ’o ssape! Isso se crere c’aggia ascì viernarí a otto... E io so’ asciuto sette juorne primma!... E quanno è dimane lle voglio fa na suppresa ’a casa!... (prende Assunta per la mano e la trae alla tavola) Assèttete! (Assunta casca a sedere) Parlammo ’e nuie!... (siede accanto a Assunta) Che mme dice? (È tenero, carezzevole, acceso un poco. Piglia la mano di Assunta e la tiene tra le sue).
Assunta
(ritirando lentamente la mano. D'un subito)
Tu nun si’ stato ’a casa toia?
Michele
Quanno esco ’a ccà...
Assunta
(fingendo sorpresa e levandosi)
Mammeta nun sape niente?!...
