Paggena:Teatro - Salvatore di Giacomo.djvu/323

'A Wikisource.
Vai alla navigazione Vai alla ricerca
Chesta paggena è stata leggiuta du' vote e mo è fernuta.
317
atto primo

Donn'Emilia

’On Federì, nun ce facimmo maste! Mo ce vo, io ’so femmena e avarria piglià ’e pparte d’ ’e femmene. Ma sta vota Assunta ll’ha vuluto essa! Neh, diciteme na cosa; chesta nun teneva cielo pe vedé e terra pe cammenà, e chillo ha pigliato e ll’ha fatto uno ’e tutto: veste, scarpe, suttanine, cammise, l’armario, ’o sigrité; basta quanno ve dico uno ’e tutto, uno ’e tutto...

Federigo

Va bene, ma...

Donn'Emilia

Mo! E sentite! Vulette essere aperta na puteca ’e stiratrice a Sant’Aniello, e stu don Michele, piglie...

Sgueglia

(che ascolta anche lui)

E ce l’arapette.

Donn'Emilia

’O pate è nu viecchio nzallanuto ca nun è buono manco a ardere. Faceva ’o cuoco int’ ’a tratturia d’ ’a Bella Napule, e ’o princepale nn’ ’avette mannà pe disperazione. St’Assunta ’o vulette essere miso ’a tratturia d’ ’o Ribicchino, e stu don Michele, piglie...