Don Gaetano
(sempre più commosso, agl'impiegati, a mani giunte)
Sì sì, faccia lei... lei ha più maniera... ha più abitudine. Zitte! (vedendo che Carmela torna dalla finestra) Ah, povera femmena! (si trae adietro con gli impiegati).
Carmela
(a Don Gennaro)
E chest’è ’a vita, ’on Gennaro mio! Io po dico accussì: È meglio ca nce ’o ppigliammo c’ ’a bbona ’e Dio, ca quanno manco te crire ’o Signore piglie e te manna na pruvirenza!
Don Gennaro
E chesto pure è overo.
Carmela
Vedite: maritemo se po dì ca nun è stato maie a spasso manco meza jurnata. Embè, cierti vvote, pe causa d’ ’e necessità d’ ’a casa, ve dico a buie ca se fanne ’e capille janche...
Don Gennaro
E chi te dà tuorto, neh, Carmè?
Carmela
Neh, ’on Gennà, e quanno maie ’o llardiciello è ghiuto a 36 e ’a nzogna mpane a ddoie lire? Che?... Addo’ s’è visto maie?...
