Carmela
Addò tene ll’uocchie tene ’e mmane! ’E’ ntiso jesce ccà? Me vuo’ fa sosere?... (la bambina s’avvicina a lei).
Don Gaetano
Ma ’o fatto ’e st’Esposito nun m’ ’avite cuntato... (ripone la tovaglia nel fodero della scrivania).
Carmela
Signurì, mo v’ ’o spieca ’on Gennaro...
Don Gaetano
(a Don Gennaro)
Na cosa ’e juorno ca mo arriveno ’e ccarte ’a ll’Intendenza...
Don Gennaro
Dunque, cavalie’, quanno io steva c’ ’a puteca sott’a ll’arco d’ ’e Cangiane sta Carmela era na criatura..
Carmela
Tenevo otte o nove anne... (a Maddalena) Matalè, iesce ccà! E so’ diece!
Don Gennaro
’A mamma era na bunissema femmena, bunissema quantu maie, faticatora e timurata ’e Dio. (si toglie il berretto) È ’a bardascia accussì venette pur essa: bona figliola, cuieta e faticatora...
