Nannina
(ridendo beffardamente) ’O figlio vuosto, sì! ’O figlio tuio e de ll’ommo tuio…
Crestina
(con un grido) Pe Giesucristo!….. (s’avventa su Nannina, fa per tirarle uno schiaffo).
Donna Rosa
(spaventata e invocando aiuto) Mari’… Mari’… Uh! (si pone fra le rissanti a impedire che si azzuffino).
Nannina
Mm’hê distrutta na casa, scellarata! Ma nce sta Dio ca se nne pava. Tutto ’o mmale ca mm’hê fatto l’hê ’a chiàgnere a lacreme ’e sanghe!
Maria
(accorre sorpresa) Ch’è stato? Ch’è succieso?! (cerca, con Rosa, di separarle). Neh, Nannì!? ’Onna Crestì, embe’?!
Crestina
(livida, frenandosi per il bimbo) Chi sa’ qua’ vôta ’e chesta te faccio asci’ ’o sanghe pazzo ’a capa!
Maria
Va buono, iatevenne. ’A Maronna v’accumpagna… (spinge fuori Crestina) ’A Maronna v’accumpagna.
