Si’ Francisco
(quasi parlando a sè stesso) Sto penzanno, tant’anne fa… pure nuie…
’A sie’ Cuncetta
(sorride compiaciuta) Uh…. che te vene a mente!
Si’ Francisco
(le si avvicina ancora un poco) T’arricuorde? ’A stessa cammarella! Accussi piccerella… accunciulella! ’O lietto sulamente mme custaie dùrece ducàte.
’A sie’ Cuncetta
Poveri guagliune! C’ànno ’a fa’…
Si’ Francisco
Ma, chisto, è pure accussi ceniéro!… (strizza l’occhio malizioso, preme con la mano su le materasse per constatarne la morbidezza).
’A sie’ Cuncetta
(un po’ spazientita, allontanandolo) E scuóstete! ’O vvide ca mme l’ammacche tutto quanto?!
Si’ Francisco
Agge pacienzia… (si china egli pure a riaggiustare le coltri smosse) Va buo’?… (s’incontrano con le mani; Francisco piglia nelle sue quelle di Cuncetta, le guarda amoroso. Per qualche istante restano così: inteneriti e confusi).
