Smanie
1
Te cerco speruto,
ma tu nun ce staie…
Che pienze? Che faie?
Si ppriva de darme
n’aiuto?
«T’arriva, sta voce?
Stu chianto t’arriva?
Si mmorta? Si vviva?
E ’a vita, t’è amara
t’è ddoce?»
Nisciuno risponne!
P’’a càmmera, sola
se spanne ’a parola,
e ’a faccia de chianto
se nfonne…
2
Na voce me dice
ca perzo aggio tutto!
«Va, viêstete ’e lutto
e chiagne lu tiempo
felice!»
«Tu, tu l’’e vuluto!
Pecchè te dispiere?
T’accide ’o penziere
d’ave tuttecosa
perduto?»
«Embè, t’accedesse!
È poco, si muore
dannato ’e dulore!
Pe tte tutt’’e mmorte
so ’e stesse!»
E allora, nce simmo!
Si è mmorta Maria,
addio vita mia!
’A morte è sullievo:
murimmo!
FERDINANDO RUSSO.
m 102615 m
