Paggena:Pulcinella - Dramma in un atto.djvu/15

'A Wikisource.
Vai alla navigazione Vai alla ricerca
Chesta paggena è stata leggiuta.
13
ATTO UNICO


addo’ sta? Chiammalo! Chiammalo! (Annoda più forte le braccia al collo della madre)

Rosa — (Ad Aniello) Comme tremma! (Si è alzata; va vicino a Giacomino) Stammo pure nuie ccà… E venuto pure zio Aniello… ’O vi’?! (Ad Aniello) E parlace! E muovete!

Aniello — (S’appressa anche lui al piccino) Giacumì!… E me vulisse dà nu vasillo? ’O cumpare t’ha purtato ’e caramelle… Chelle dinta carta, ca te piaceno tanto… (Leva di tasca un carloccello) Tiè… Ll’aggio fatte scegliere apposta… Amenta… cafè… e vainiglia, chelle ca te vanno cchiù a genio…

Rachele — (Ha preso il cartoccetto e lo presenta al piccino) Pecchè tanto incomodo?

Aniello — Io lle vulesse dà ’a vita mia a chistu criaturo! (Con voce di pianto, commosso sinceramente) Io sto malato cchiù d’isso! Vuie le site mamma… Ma io me l’aggio crisciuto dinto a chistu palazzo!… Ogne ghiuorno, quanno turnavo d’’a fatica, ll’aveva purtà ’e duie solde ’e caramelle… E isso m’aspettava… Nun mm’’e cercava… Ma io ’o capivo dint’a ll’uocchie… ’Na sera mm’è scurdaie e ll’uocchie suoie avetteno n’ombra ’e malincunia… E io nun mm’’e scurdaie cchiù! (Si volge di lato. La commozione gli serra la gola. Non vuol far vedere che piange. Porta il fazzoletto agli occhi. Va verso la vetrata. Guarda fuori, appoggiando la fronte ai vetri. Da fuori, in questo momento, giungono le voce dei bimbi che sono venuti sul terrazzino e passano parlando un po’ forte. Dopo poco si bussa all’uscio comune.)

Giacomino — (È sempre abbracciato alla madre, che lo accarezza)

Rosa — (È andata all’uscio per vedere chi sia).