Chesta paggena è stata leggiuta.
56
sunettiata
III.
(nnanz' 'o ffuoco)
— M' aggio sunnato nu suonno stanotte
ca si nce penzo me sento azzellì!
Abbascio a na cantina 'a reto 'e vvotte
nu piccerillo steva pe murì!
— E comme! — Già! Teneva cinco bôtte
po' 'o cuorpo... 'O sango culava accussì...
comm' a nu sciummo... Cu 'e braccelle rotte,
nu scennuflegio...! E che vularrà di'!
— Ah, cummarella mia, che brutto segno!
Ninno che more e sango... è segno 'e guerra!
Ha da capità brutto, 'a dinto regno!
'O Quarantotto io pure me sunnaie
nu piccerillo muorto acciso, nterra,
culanno sango... E 'o suonno s'avveraie!
